Kylie零粉絲接機一樣熱情
澳洲天后Kylie Minogue闊別三年再在港開騷，昨晚六時多，穿吊帶低胸白色裙及戴黑超的Kylie由一名外籍猛男傍住步出抵港大堂，並向在場約廿名守候她的記者揮手打招呼，表現非常親民！Kylie獲一名機場保安護送，現場卻未見有粉絲接機，但她未有黑面，全程笑面迎人。
剛完成巡迴演唱會新加坡一站的Kylie，對記者的熱情問候感到非常驚喜，略現疲態的她先跟香港傳媒打招呼，並說：「我好耐冇嚟香港，（搭飛機好攰？）都幾攰，見到大家我有啲受寵若驚，好興奮！」由於傳媒的咪牌眾多，未知是否因擋住其視線，她一度用手撳低咪牌。問到其巡唱是否順利，她說：「真係非常之咁好，我同香港好有淵源，好開心再嚟開騷！（會去shopping？）雖然冇咩時間，但我都係女人，點都會擠啲時間出嚟行街。」訪問後，Kylie登上下榻的灣仔君悅酒店專車直返酒店，在職員安排下從卸貨區進入酒店。
會展開騷舞台揼本
Kylie於08年在香港亞洲國際博覽館開騷，相隔三年，她將於今晚在灣仔會展舉行Aphrodite巡唱香港站，舞台設計非常揼本，14呎高的黃金飛馬、馬車、旋轉樓梯升降台等肯定令人目眩神迷！完成香港站後，Kylie將飛到台灣、馬尼拉及南非演出。
文：專案組