志偉陳美齡敍舊八美陪食

今年三月日本發生世紀大地震後，香港演藝界由曾志偉發起賑災騷，他率領全港過百藝人參與，並聯絡移居日本多年的香港歌手陳美齡合作。這次曾志偉與一眾藝人到日本拍特輯，振興當地旅遊業。前晚他率領陳嘉桓、江欣燕、呂慧儀、梁靖琪、黎芷珊、張美妮、黃宇詩和秦沛女兒姜麗文等八位靚女，與陳美齡見面歎懷石料理，相識三十年的好友相聚，一見面即互相問候和送上手信。

災民仍要幫助

在日本生活多年的陳美齡說：「三月地震時人心惶惶，依家情況穩定番，食水和食物回復正常。我同家人慳電，天氣凍就全家集合一個房間開爐取暖，晚上唔開燈。」地震後她曾到重災區福島兩次：「第一次去見到環境好惡劣，啲屋被沖到爛晒，有啲船仲被沖到上屋頂。最近我再去已有街燈，但災民仍然需要幫助。其實東京以北地方啲人仍然心情沉重，但以南就演唱會照開，歌舞昇平。」

陳美齡請志偉及八位美女食懷石料理。

志偉與陳美齡相交三十年，難得一聚。

教授異國文化

她透露在日本做義工、唱歌和教書：「我教異國文化交流，日本人要多與外國人溝通，我三個囝囝都識普通話、日語和英語。」今年七月她將會返港探望媽媽等親友。志偉表示與陳美齡相識三十年：「當年我同譚詠麟一齊識佢，不久佢就嫁去日本，今次我搞賑災騷，佢由頭幫到尾，仲將個騷攞去日本播，畀大家知道香港人支持佢哋。」