黃婉曼玩《撳錢》非為獎金
昨日有觀眾投訴Now節目《撳錢》的主持黃婉曼，曾在facebook透露家屬有參與該遊戲，做法有違主持守則，對於有關指控，她解釋：「我諗係誤會，我啲親戚全部喺內地，根本玩唔到《撳錢》，而我嘅直系親人就算答中晒八條都唔會有錢分。（冇錢分你都照玩？）我只係想感受吓觀眾玩嘅心情。」至於Now公關亦證實，主持與直系家屬雖能參與遊戲，但即使答中所有問題，都不會獲發任何獎金：「每位主持最多知兩條答案，唔返工直情唔知，所以絕對唔會出現通水嘅情況，大家可以放心。」
此外，黃婉曼昨日與陳豪出席護膚品牌活動，陳豪因自愧不如而拒拍泳褲廣告。