(10)李天縱發功漏奶遭導演炮轟
【陳永峯台灣直擊】(10)李天縱日前因逼爆泳裝亮相後被封為「咪神」，一嘗風頭躉滋味的她昨日再次發功，於外景場地俯身餵奶給羊群時，胸前走光再成為全場焦點，更因只顧望相機忽略無綫攝錄機而遭導演鬧。
14位港姐昨日一身吊帶裙打扮，於台中清境農場分批拍攝羊群餵奶外景，期間8至15號佳麗正投入拍攝時，(10)李天縱竟忘形「漏奶」餵羊群，將一直是新聞女王的(3)許亦妮風頭蓋過，再贏一個回合，然而李天縱只顧應付記者相機鏡頭，而忽略了無綫外景隊的攝錄機鏡頭，令導演忍不住大鬧：「望呢邊啦！」李天縱當場尷爆。
許亦妮猛呻無辜
李天縱顧此失彼，她解釋因母語是普通話，聽不明導演講廣東話才忽略攝錄機鏡頭，問到胸前「漏奶」是否衫太鬆？她說：「之前改過，還好，（知走光？）不知道，下次會注意。」她續說：「我都係第一次被導演鬧。」問到會否怕人妒忌？以及是否搶了許亦妮風頭？她說：「唔會，跟對方同房，星座又合拍！我現在想專心拍外景，不想諗誰風頭勁！」
(3)許亦妮風頭被蓋，是非總算稍歇一會，一向被指男友多多的她，前日終得唐貝詩挺身力撐並非貪錢和專一。許亦妮表示二人於英國讀書時認識，屬好朋友，參選雖冇問對方意見但亦獲支持：「我都幾專一，其實我好無辜，我同每個男仔都拍上幾年拖，（參選多是非有冇後悔？）冇，學到好多嘢。」
蔡慧欣一露獲讚
至於騰雞港姐(13)蔡慧欣日前亦因泳裝亮相後展露好身材而被讚，她昨日說：「開心有人讚，（(10)被導演鬧，你有冇試過？）冇，教我就有，（惹來妒忌？）其他佳麗都好好，我英國返嚟唔識中文佢哋都幫我翻譯。」