婷婷爆霆鋒搞機把口撬唔開
「鋒芝危情」成全城熱話！與哥哥謝霆鋒感情要好的謝婷婷，日前專程飛吉隆坡探班兼開解，昨日她現身活動時透露哥哥心情未有異樣，繼續打機，以及常擺出一副如吃了花生醬的檸檬般表情。她坦言不敢過問霆鋒婚姻事宜，但就承認與兩名姪仔已有兩個月沒見面。
謝霆鋒與張栢芝自傳出婚姻觸礁後，每日亦有不同消息傳出，惟雙方至今尚未開腔回應，結果他們的親人成為追訪對象。與霆鋒感情要好的妹妹婷婷，日前便飛到吉隆坡探望正忙於拍攝英皇電影《逆戰》的霆鋒。昨日婷婷出席手機活動，曬黑了不少的她一出現便成焦點。
兩月冇見姪仔
婷婷透露此行有與霆鋒見面，本欲到拍攝現場探班，但礙於聚集不少傳媒，故最後打消念頭。問到霆鋒心情如何？她謂：「都係日日打機，唔係要發洩，因為佢由細到大都鍾意打機。我哋冇特別傾阿嫂嘅嘢，反而話題都係關於打機。其實今次係探安志杰班，順道探埋阿哥。」對於有指栢芝準備帶兩子遠走溫哥華，婷婷表示不知情，更指若然霆鋒沒有主動談及便不敢過問半句。
提到雙親謝賢與狄波拉表示已很久沒見兩名孫兒，婷婷坦言與Lucas及Quintus亦非常常見面，對上一次碰面已經是兩個月前的事，並指母親現時仍在新加坡，為丈夫鬍鬚Kong湊孫。問到若霆鋒真的與栢芝離婚可會支持？婷婷謂：「希望佢兩個都開心啦！（會唔會勸霆鋒挽救婚姻？）都冇提過，佢唔主動講我唔會問，總之佢心情冇變，都係食咗花生醬嘅檸檬咁囉！漿住咗個口，聽唔到佢講咩。」
阿嫂印象冇變
婷婷再次強調霆鋒心情如常，日前他們還於當地出席友人生日派對，由於霆鋒不飲酒，故當晚滴酒不沾。她說：「我好清楚霆鋒個人，佢要講自然會講，不過我覺得佢會搵身邊朋友傾多啲！佢大個仔嘞！（擔心？）由細到大佢好多事發生都處理得好好，所以我覺得佢會搞得好。」對於近日栢芝負面消息不斷，問婷婷有否對阿嫂印象打折扣？婷婷不諱言有不少人欲向她報告，但她選擇不聽半句，因始終涉及「鋒芝」的私人事，若向栢芝求證，也似乎太多事，故栢芝於她心中的印象尚未改變。
另外，記者昨日致電謝賢，他一聽「父親節快樂」即cut線，狄波拉則繼續飛留言信箱。
文：影視組