高鬥
女生向來情迷高踭鞋，且愈高愈愛，樂壇小天后Lady GaGa不惜仆倒拗柴都要穿上十二吋高踭鞋就知其魔力。在各大時裝設計師力煲下，高人一等的Platform Shoes今夏強勢回歸時裝界，由天橋踏入大街小巷成為人氣爆燈潮物，女星索模個個熱着。名模陳嘉容（Eunis）就大讚阿Sa及阿嬌穿高踭鞋穿得夠型兼夠stylish，何超儀則穿出修長線條，盡顯體態美。
鍾欣桐（阿嬌）、蔡卓妍（阿Sa）
型到爆，好sharp好突出，條裙好特別，撞埋對鞋度好靚好好睇，好stylish，係佢哋咁後生至carry得到，一身打扮襯到佢哋好yeah嘅氣質。
佘詩曼
影到佢對腳短咗，好在佢本身身形線條夠修長，但對鞋嘅顏色同件衫唔係好match，如果換對米白色或者深啡色嘅鞋會仲靚。
周秀娜
一般，夏日少女look，幾襯佢，好青春，騷到佢對咁靚嘅長腿，不過成個造型唔夠sharp。
謝婷婷
對鞋不過不失，唔特別，係穩陣之選，大方得體，可以出席任何場合。
樂基兒
冇乜特別，唔突出，好似鄰家女孩嘅感覺，好casual，出席公開活動略嫌唔夠隆重，如果多番少少accessories會好啲。
何超儀
簡單得嚟幾型，拉長晒成個身形嘅線條，就算着橫間都依然顯得好纖瘦，好有曲線美。
樂瞳
對鞋好肉酸，佢對腳已經唔係長，着咗對鞋睇落就更短。如果佢一定要着呢對鞋，就換件top襯白色短褲，一係就換對搭帶涼鞋，唔好太花巧，簡簡單單就OK。
陳嘉容，香港著名模特兒，曾為各大國際品牌行時裝騷，在時裝界打滾多年，對時裝方面的認識無論是理論還是實戰都難不倒她，近年更為電視時裝節目擔任主持，化身Stylist教人配襯衣着打扮。