江若琳眼大Man過龍 擇偶唔嫌窮
江若琳是一個錯配人物，水汪汪的大眼配嬌小身形，骨子裏竟是「會一飲三百杯」的麻甩佬，一句「其實我好Man，成班朋友得我可以一乾而盡」，豪氣更勝鬚眉。不過始終是女兒身，都想有天嫁個好歸宿，擇偶條件好簡單，莫財樣衰不打緊，至緊要是不嫖不賭。
酒來乾杯 豪氣逼人
怎麼江若琳天生不是男人？身為女兒身，卻一身是膽，連男孩子也不及她義薄雲天，莫非DNA出錯？
「有好多朋友問我有冇公主病，我點答你呀，自己又唔係Blue-Blood，又唔係萬千寵愛在一身，自問就冇公主病，因為我本身Man底，綜觀所有男、女朋友，我一直係最Man，次次去飲酒，只得我次次一乾而盡，唔似普通女仔姐手姐腳。有時會諗，自己會唔會太Man呢？之前拍《戀夏、戀夏、戀戀夏》，同好多o靚模合作，發覺自己好有艷福，有Carol（楊梓瑤）咁索嘅女仔一齊拍戲喎，幾咁開心呀，哈哈！」
「順帶一提，之前傳我同陳鍵鋒拍拖真係好搞笑，大家只係朋友，乜都冇發生過，因為佢真係冇當過我係女仔，我亦都冇當佢係男仔，大家性格差唔多，所以好夾，可以做兄弟或者姊妹。我哋講過，如果對方真係可以嫁得出或娶到老婆，我哋從此可放下心頭大石。」
理想丈夫 首選青雲
畢竟渾身男仔頭性格只是個性使然，江若琳依然是一個等愛的女生，可惜男子要通得過重重難關，才可成為她的Mr. Right。
「好耐之前成日希望三十歲前結婚，依家人大咗就唔係咁諗喇，你估揀棵菜咩！所以我一啲都唔潮，絕對唔會閃婚，起碼要認識七個月至可以有深入了解。只要我另一半唔嫖、唔賭、唔爛蒲、孝順、有才華、夠上進、專一、識體諒我就得喇，冇錢、唔靚仔真係一啲唔緊要，係咪好簡單呢！」
「我心目中，劉青雲就係完美老公嘅典範，因為我曾經目擊佢點樣同老婆（郭藹明）相處，成日Baby前、Baby後，真係好Sweet，每次提起太太都好似初戀咁，去親街都會拖到老婆好實，實在太令人羨慕喇！」
唔恨着婚紗
「我依家知道結婚真係唔容易，係將兩個人由冇愛變有愛，亦係將兩家冇關係嘅人變得有關係，當中真係大有學問。話時話，如果有日真係結婚，一定唔會搞甚麼世紀婚禮，亦唔需要大排筵席，低調啲好，千萬唔好隆重，就算我唔着婚紗都冇問題，因為都着過咁多次，冇晒披起婚紗、徐徐步下嘅憧憬，如果好似林熙蕾咁喺小島搞婚禮就最Perfect！」
香港局限 放眼世界
江若琳知道香港市場小，她明白要紅一定不可以局限在斗室內發展，與其坐井觀天，不如放眼世界。
「我依家每年留喺香港時間只得三分之一，內地同東南亞係我主攻嘅市場。去到呢啲地方拍劇拍戲，真係可以令我放眼世界。香港拍劇嘅節奏真係太快，大陸會慢工出細貨，做一件藝術品出嚟。唉！冇辦法啦，好似拍古裝咁，香港只得南生圍同荔枝園幾個地方取景，你睇吓大陸？真係有幾多靚景呀，先天因素已經贏晒啦！我可以做嘅，惟有係努力啲睇好劇本，真係唔想有人話我唔識做戲。」
後記
因為江若琳是一個錯配的人，做人Man得可以，所以她不喜歡化妝出街，甚至連普通的護膚工夫也懶得去做。得天獨厚，沒辦法，難怪江若琳是一個容易惹流言蜚語的人：「我唔鍾意刻意打扮，係因為工作先要化妝，不過我天生嘴唇容易爆裂，所以都會帶十支八支Lip Gloss出街。如果可以男仔咁求求其其出街，你話幾好呢！」
文：專案組
攝：秦健輝
服裝：MAGin
髮型：James Lee@HAiR
化妝：諺瞳小白@Picturesque Gate
鳴謝：Lancome