胡杏兒認與Bosco「更上一層樓」
胡杏兒、黃宗澤（Bosco）雖是公開的一對，但男方時有新緋聞，有指杏兒最近搬到男友屋苑樓上，實行以「女上男下」方式進行全天候監察，杏兒甜笑否認，當被建議同居時，她揚言未到此階段。
杏兒、鍾嘉欣、歐陽震華、賈曉晨、馬賽等昨出席無綫古裝新劇《樂府藏龍》開廠拜神儀式，對於有指杏兒最近搬到Bosco住所樓上以「女上男下」方式監察，杏兒笑着否認：「因為之前住嘅屋苑外牆裝修，又嘈又烏煙瘴氣，以前去過佢屋企覺得幾光猛，咪搬過去囉，（係咪方便見？）唔係，成日都見到啦，（點解唔同居？）唔得！（驚畀佢見到未化妝個樣？）唔化妝個樣化妝間成日都見到啦，都未係同居階段。」
鍾嘉欣否認新戀情
杏兒被追問時，雙手扭着假髮織成的長辮子，明顯表現緊張，記者笑她經常做主動搬近男友，她即反駁：「唔係呀！上次係佢搬過嚟o架！」場面搞笑。此外，嘉欣被拍得與圈外男友人約會後分開避追訪，她否認是約會：「只係普通吃飯，中途落車係唔想朋友因我被起家底，（再約食飯？）會，朋友永遠係朋友。」
馬賽與吳卓羲「玩完」
同場的馬賽跟吳卓羲曾傳緋聞，對男方被拍得駕靚車接載緋聞女友張馨予，馬賽說：「我哋係普通同事，唔方便講人哋嘅事但證明緋聞係假，（甩難？）唔可以用呢個詞，（酸溜溜？）更加唔會。」
文：影視組