余曉彤封口齋做大包圍
新八模成員余曉彤（Hidy）今年將單飛出寫真，力戰多位「大胸模」，默默耕耘的Hidy認為講多無謂，行動最實際，近半年接下近十個廣告，務求吸納不同的粉絲，更積極向歌影模三棲發展！
現年23歲的Hidy憑藉其Sporty外形成功搶灘，近半年除了接下近十個廣告，賺逾六位數字外，又積極出騷搵銀增強曝光率，並與師姐周秀娜、黃宗澤及「萬寧哥哥」沈志明等齊齊行騷，為暑假出寫真奠下人氣根基，她說：「其實我出道咗一段時間，好多客戶知我識潛水，覺得我較有運動嘅感覺，畀好多機會我！」
目標闖影壇
面對中港兩地多位強勁對手，同公司的Jeana又常以「豪語」出位，反之Hidy就自信地表示與別不同，能吸引不同的讀者群：「我走Sporty路線，比較有陽光氣息，我覺得做緊要過講！」
Hidy擁有四分一西班牙血統，與o靚模始祖Angelababy同樣有混血兒優勢，她亦表示視對方為目標想跳入影壇，至於Hidy有份參演的電影《熱浪球愛戰》及《人約離婚後》將於暑假上映，現時她又積極練舞，準備與其所屬組合OctoBeez於暑假「合體」出騷，谷盡人氣！
學外語增值
雖然忙得不可開交，但Hidy亦不忘自我增值，正向楊盼盼學功夫望做打女，而除了能操英文、泰文及西班牙語外，最近她亦正學習普通話：「希望進軍內地市場，做到周身刀張張利啦！」
文：影視組