「o靚版池珍熙」成面疤急跌WATT

香港先生十二位入圍參賽者昨日返電視城作首次聚會，之前較為突出的「翻版黃長興」Hugo、「拉丁張立基」Paul、「作狀黃德斌」Leo、「o靚版池珍熙」Clayton、「電眼周柏豪」Douglas、「嫩口王賢誌」Derek、「藐嘴Rain」Kit、蕭家浩（Edmond）順利入圍。

身形突然縮水

昨日十二位參賽者中，仍以「翻版黃長興」Hugo最懂搶鏡，大擺大隻佬甫士，身穿長袖恤衫的他被指「嘥料」時，他謂：「遲啲先畀大家睇。」31歲的他自稱正職是救生員，兼職民安隊。27歲來自北京的Aleyson是舞蹈員，亦有擺出轉圈跳舞動作。而20歲「藐嘴Rain」Kit被女記者指穿恤衫騷不到肌肉時，搖頭電記者。

「翻版黃長興」Hugo最懂搶鏡，擺大隻佬甫士。

在北京當舞蹈員的Aleyson，於會上大騷身手。

之前被視為最靚仔的「o靚版池珍熙」Clayton昨日狀態突然跌Watt，身形除了忽然縮水外，嘴、人中、鼻更有一撻撻的傷痕，顯得垂頭喪氣，問到發生甚麼事時他只擰頭不語，狀甚不快，外國回來的他被女記者問到從哪兒返港時，竟然藐視離去。

「嫩口王賢誌」Derek笑容夠晒「煞食」。

「藐嘴Rain」Kit獲樂易玲暗讚夠cute。

無綫高層樂易玲接受訪問時表示今年有兩位海外參賽者，分別來自英國、加拿大，提到「o靚版池珍熙」臉上的傷痕，樂小姐表示不知情，要問對方才知。問樂小姐有否看中一些有藝員潛質？她說：「有o架！心裏有數，有一個20歲，面試時跳舞嘅，都好cute呀！」相信她指的是「藐嘴Rain」。

樂易玲寸許亦妮

說到港姐候選佳麗(3)許亦妮新聞多多，更被指由健身院太子男友介紹下認識樂易玲，因而獲她賞識，昨日樂小姐笑言：「我唔健身o架！所以我唔識佢！」對於許亦妮被指內定冠軍，她謂：「唔係我做評判啫」

她又暗寸有不少照片從facebook流出的許亦妮：「所以我哋做媽咪成日都要教啲細路，影相開party、生日會都要睇住，唔知有一日選港姐又好，選港督（特首）又好，好易畀人攞番出嚟講。」

文：影視組