陳嘉桓唔吼「爆肌林峯」

林峯緋聞女友陳嘉桓昨日以評判身份出席招募活動,其中一位參賽者「爆肌林峯」羅浩銘雖身懷六舊腹肌,可惜表演時全程頭耷耷,慘被評判罵到狗血淋頭。嘉桓也幫理不幫親,坦言似林峯亦冇着數!

打女出身的陳嘉桓,昨日與師兄杜宇航擔任《功夫新星》招募行動的評判。雖然參賽者有老有嫩,當中不乏打得之人,但亦有騎呢分子。其中一位參賽者鄧簡文,穿上李小龍遺作《死亡遊戲》的經典服飾,凸肚腩亂舞雙節棍,令人忍俊不禁。另一位參賽者鄭裕軒更加出事,骨瘦如柴的他學人打詠春,可惜身形似紙板,打起來拳拳冇力。

翟威廉撐好友

其實打得又睇得都會出事!另一參賽者羅浩銘雖然貌似林峯,加上渾身是肌,打起跆拳道有板有眼,可惜表演時全程頭耷耷,被有「魔鬼評判」之稱的國術裁判彭志銘鬧到一文不值,連嘉桓也幫理不幫親,暗示即使貌似林峯亦不會有着數。原來「爆肌林峯」是港男翟威廉好友,翟威廉與應屆香港先生參賽者蕭家浩專程到場為「爆肌林峯」打氣。據知蕭家浩已入圍決賽,故順道向翟威廉取經。

嘉桓接受訪問時坦言並非一定要識打詠春才能吸引她注意,同時亦會留意參賽者外形:「其實外形都好緊要,要打得又睇得。」問是否外形要似林峯?她說:「打功夫唔使個個同一樣樣嘅!」再問揀男友是否要似林峯?她醒目地答:「我唔會規限係乜嘢樣,因為個個人嘅樣唔同!」

杜宇航挑選嚴謹

曾在多個武術比賽掄元的杜宇航表示早前已到新加坡為節目揀蟀,自言挑選準則十分嚴謹,並不會馬虎了事。他又透露將要為電影宣傳,問可有加片酬?他說:「都好滿意,大約有七位數字。」另外,身為主持的歐陽靖(MC Jin)自稱非打得之人,因此想學功夫。他又稱最近忙於拍新劇《潛行狙擊》,因而冷落嬌妻。

文:專案組