朱璇苦笑：佢係我契哥

早前朱璇跟湯臣集團副主席、前影星徐楓兒子湯珈鋮及好友陳爽同往觀賞五月天演唱會，因而令她的緋聞史上來個「零的突破」，當外間以為她覓得筍盤，朱璇卻苦笑：「第一次呀，我都唔知點面對，其實好無辜，因為佢係我契哥！依家新聞出咗，搞到啲男仔唔敢追我，（之前好多人追？）就係已經冇乜，依家更加冇！」

朱璇透露，年前拍楊凡的電影《淚王子》時，認識了湯珈鋮及其媽媽、哥哥，大家都對她很照顧，所以跟湯珈鋮猶如兄妹：「我哋各有各忙，平時好少聯絡，只係間中睇戲、睇演唱會，（筍盤喎！）希望佢快啲搵到佢嘅灰姑娘，我同佢鬥快搵。」

朱璇身為美女，身邊卻乏追求者。

朱璇（左二）早前被拍到與湯臣集團副主席湯珈鋮（左）睇騷而傳緋聞。

曾有圈外霧水情緣

來港發展兩年多，朱璇未拍過拖，但她坦言不是太恨：「我都唔覺得悶，依家廿幾歲，做多啲嘢先啦，嘻嘻……不過如果有得拍都唔介意。」不過朱璇承認自己性格被動，又不愛出街，之前有圈外人追，結果沒下文：「有時工作忙，我都唔覆人，咪冇發展囉！（圈中人呢？）冇可能！感覺好奇怪，大家係同事，唔想自己拍拖又係同一班人，萬一分手撞到就尷尬啦！」她覺得每人應有自己的生活圈子，不應只跟同事日對夜對。