胡杏兒得把口拒行股惑
鄭嘉穎、胡杏兒主演的新劇大前晚首播，高開卅點，嘉穎的露股鏡頭可謂功不可沒，杏兒笑言若收視好會要求嘉穎露多啲，嘉穎則謂要周詳地考慮。
前晚嘉穎、杏兒相約《怒火街頭》演員李璨琛、林子善、陳敏之及一班幕後，到深水埗食晚飯齊齊欣賞劇集。杏兒謂她與嘉穎都正開工，未能在首集相約飯局，但知道首集收視有卅點，今次當是小小慶祝聚會。
自爆有激咀戲
杏兒還調皮笑言：「都要多謝嘉穎露佢嘅男人事業線（股罅），仲擺上微博吸收視，借用佢個『優質股』，（仲有咩露？）敏之會露佢雙長腿啦，（你呢？）我展示我嘅口才，其實同嘉穎都有場激咀戲，（收視再好啲點慶祝？）叫嘉穎再露多啲囉，佢應該唔介意嘅，女人嘅事業線露得多嘛！」
懶理大牌報道
對於其露兩吋股罅引來大眾津津樂道，嘉穎笑言是大家「畀面」，問到拍攝時可有思想掙扎，嘉穎說：「我記得係導演提議，都諗咗一陣，覺得係合理嘅就接受，好似掹鼻毛都係我自己諗嘅，（杏兒建議收視好再露多啲？）睇吓點先，呢啲係團體嘅事，我要同李璨琛佢哋幾個商量下先。」
此外，早前嘉穎被指拍攝《拳王》時扮大牌又遲到，還發老脾踢傷陳志健，嘉穎謂不想多作解釋，報道要亂咁寫我都沒辦法。
文：影視組