林子祥秋後算帳追收版稅

林：林子祥　旦：鄭丹瑞　珊：林珊珊

旦：我好似同你同一年入行，喺電台第一次見面。

林：我1976年入行，三十五年喇。

珊：當時我仲喺界限街返緊學。

旦：其實我哋有今日都係因為阿Lam，當時未流行咩卡拉OK，我哋又好鍾意唱歌，但係冇唱片公司肯簽我，結果係《小魚仙》有個「慈善唱家班」環節，第一集播出街，我哋就係唱《三人行》。

珊：係呀，唱《三人行》，你估邊三個呀？唔使諗，我就梗係唱詩詩小朋友嗰part啦，何嘉麗唱劉天蘭個位，佢就以為自己係林子祥囉。

旦：結果唱得好似好可愛咁，佢兩個就畀人簽咗，剩番我。

珊：你都唔知，我係撲去華納呀，華納入面有陳百強同阿Lam喎，唔使諗啦，我係歌迷心態入去，每日返工當係fans club party聚會囉。

旦：一隻歌已經紅咗，之後阿Lam仲搵我哋拍《十分十二吋》個MV，不知幾開心，能夠參與阿Lam嘅嘢已經好開心。

珊：我哋跟住仲拎住呢首歌去登台。

林：一隻歌走天涯呀？咁我要收版稅喎！

童年時逢開窗 便會望見會飛大象 但你罵我為何這樣失常

從前傻頭小子 從前傻頭小子 但已練成能往心內奔馳

阿旦執二攤做同志

林：你幾時開新戲？

旦：開戲梗係搵你契女黃真真啦，我呢個監製夠成日想自己有份演啦！

林：我有睇過你做戲啦，做基佬！

旦：係呀，《出軌的女人》夏文汐老公個角色。

林：套戲啲角色調來調去，你知唔知本來我係做你個角色，不過因為基佬我做過，叫佢搵過第二個。

珊：叫你做夏文汐老公？唔怪得畀人ban咗啦。

旦：不過話時話，我有諗過搵日搞騷，咩騷都好，再唱《三人行》到時我升上台，你就喺後台幫我咪嘴！

林：搞錯呀，咪嘴，你嚟我六月個演唱會一齊做嘉賓啦，詩詩同埋劉天蘭都會到，到時你唱我個位咪得囉！

旦：嘩，認真呀？化妝整頭唔知邊個畀呢？

珊：佢有份唱，咁我做乜好呀？大大話話都係你個仔經理人吖！

林：你幫我個仔化妝！

旦：點解唔叫你個仔合唱《三人行》？

林：唔好，咁樣好怪！唔理呀，到時你嚟睇，我見到你就拉你上台唱！

旦：我突然諗起有啲事嚟唔到！

林：但係我會唱《追憶》、《空櫈》同埋《單車》喎！

旦：你真係好鬼衰嘅啫！其實阿Lam啲演唱會，真係唔可以唔睇！

珊珊幫Lam仔發圍

林：咪住先，我個仔點先？

珊：好驚喎你咁突然咁問，嗯……等佢練吓歌先啦！

旦：我見過佢喎，上過公司幾次，幾靚仔幾得。

珊：靚仔過林子祥！哈哈！簽咗佢個仔咁耐，我都係第一次見阿Lam，啱啱一見面就問個仔點，搞到我好大壓力，不過今年下半年應該見大家，不過今日咁近見你，覺得原來你兩個都唔係真係好似樣。

林：我成日叫佢剃鬚，佢又唔肯，同當年大家叫我剃一樣囉！

珊：有次佢做完訪問，話要求我一件事：「我真係好想留，如果剃晒佢，好似冇着衫咁！」

旦：其實佢冇剃鬚係咩樣呢？我都好好奇。

林：佢冇鬚就似我個仔，有鬚就似我Daddy。

珊：我就係覺得兩父子唔需要太似，不過最緊要佢行出嚟有信心同埋舒服，如果佢想留，我咪尊重番佢囉！

林：咁佢一開始出嚟做嘢，大家就會有唔同意見，睇反應點啦！

林德正唔單止有阿Lam音樂細胞遺傳，仲留埋老竇嘅招牌鬚。

（左）我個仔靠晒你啦（設計對白） （右）放心啦，包喺我身上（設計對白）

星二代接棒上位

除了阿Lam囝囝林德正準備出道之外，不少藝人的仔女都繼承上一代的DNA，跟父或母一樣走入娛樂圈。

謝婷婷：謝賢跟狄波拉誕下謝霆鋒這位天生的演員外，女兒謝婷婷繼模特兒工作後，近年開始接拍王晶的電影做新一代的「晶女郎」，她坦言會向哥哥取經，令謝家成為完完全全演藝家族。

Benji & Lesley：爸爸秦沛演技精湛，一對寶貝仔女卻鍾情音樂，在外國不靠父蔭擔任節目主持，直至返港正式推出新碟做歌手，獲得不少新人獎項，令爸爸秦沛非常感動。

小小彬：爸爸小彬彬（溫兆宇）是八十年代影圈的童星搶手貨，演過《合家歡》、《大小不良》等電影，小小彬除了跟爸爸生得一模一樣外，亦獲賞識參與多部台劇演出。

採訪：卓藍 攝影：司徒國榮 場地：皇家太平洋酒店