李蕙敏：我財政冇問題
40歲的歌手李蕙敏（Amanda）因長江後浪推前浪下，近年絕迹娛樂圈，最近更頻傳負面消息。有雜誌更繪形繪聲的指她欠債纍纍，昨日有讀者提供短片，拍到Amanda現身信貸資料公司做財務評估，再度引來揣測其經濟出現問題！不過，Amanda昨向本報澄清絕冇借錢，擔心嚇壞年邁的媽咪。
十多年前Amanda憑一曲《你沒有好結果》一炮而紅，一句「一刀插入你心」唱到街知巷聞，惟樂壇競爭激烈，近年她已經冇碟出，在香港亦甚少曝光，早前被周刊報道指她欠下百萬卡數被大耳窿追債，儘管她已作出否認，負面消息仍然衝着她而來。
據說兩男陪同
有讀者昨日向本報提供一條短片，指Amanda於下午二時許現身尖沙咀的環聯資訊有限公司，辦理信貸資料財務評估，戴墨鏡的Amanda身穿白外套襯紅色半截長裙，據讀者表示：「李蕙敏畀兩個男人『陪住』上嚟辦手續，我仲聽到佢同兩個男人講：『等緊，唔好咁急。』之後佢入咗房搞手續，嗰兩個男人就落咗樓。」約一小時後，拿着一疊文件的Amanda匆匆離開，等(車立)時還心急翻看文件，行色低調，似乎怕被人認出。
據資料顯示，環聯是信貸資料公司，任何人凡向銀行、財務公司借貸，如有需要可向環聯做一份財務評估，證明信貸紀錄良好方便向銀行或財務公司作出借貸，故Amanda之出現又再度引起揣測。
銀行建議備案
本報傍晚走訪Amanda年初於中環和友人合資的明石玉器首飾店，發現店門關上，記者聯絡上Amanda她承認有上環聯，但不是為了借錢：「吓！太誇張，絕冇咁事，嗰間係正經公司，我自己一個人去，冇彪形大漢陪同，我去做正經事，幫媽媽去check啲嘢同攞文件，呢件關乎家事、私事，唔方便透露，嗰間公司（環聯）好多人搵，留學、買樓都有人搵佢。」
對於欠百萬卡數傳聞，她沒好氣說：「我有問銀行發生乜事？我得一張信用卡，擔心資料被盜用，銀行check過話冇報道所講嗰啲數字，建議我報警備案。同律師商量後，為保障個人私隱原因去備案，我覺得呢件係惡作劇，可能有人黑心。」又笑說：「簽咁多錢唔知乜信用卡，我嗰張冇可能簽咁多。」
朋友關心問候
自欠債傳聞傳出後，她收到很多朋友關心問候：「朋友亦唔信報道，叫我唔好唔開心，其實最擔心啲人信以為真亂同媽咪講，媽咪年紀大，最驚嚇親媽咪，講我冇所謂，千祈唔好嚇親媽咪。」她再三強調絕對冇經濟問題：「平時有上大陸、澳門唱騷，經濟冇問題，我好好，生活好開心，多謝關心。」她透露玉器店一直有運作，因拍檔有時出外入貨，她冇時間看舖就唔開門，但生意幾好。
文：音樂組