梁靜茹減壓靠情人知己
馬來西亞歌手梁靜茹的巡迴演唱會舉辦在即，她坦言不介意老公於個唱中上台，不過對於合唱就大叫「唔好」，怕老公唱歌令她忍不住大笑，無法繼續唱歌。她還說有情人知己幫她減壓。
梁靜茹（Fish）最近為巡迴個唱積極備戰，她表示今次會有較多的跳舞環節，但自己一向肢體不太靈活，希望今次可以拋開束縛，盡情享受音樂的節奏感。問到會否與男dancer大跳辣身舞？她說：「咦，未諗過呢part喎。（可以叫老公同你練？）叫佢練，咁搞笑？都係睇老師啦，不過應該唔太適合我。」
笑老公唔唱得
問到老公趙元會否同上台？Fish坦言：「如果佢開心，氣氛到都會上台，佢習慣晒，喺美國有fans同佢講嘢佢都會回應，佢都幾錫fans！（合唱？）呢個就唔得，佢唔係好識唱歌。（五音不全？）都唔係幾全，佢好驚唱歌，有時我喺屋企逼佢唱兩句，我都笑到哈哈哈咁，我驚到時佢上台唱我會笑到唱唔到！」而今次Fish便特地練了一首廣東歌及高難度的英文歌於香港站表演，希望屆時可給大家驚喜。此外，她亦直指開個唱只有兩個要求，一是要多唱歌，二是要接近歌迷。
壓力大發噩夢
每個人面對壓力時亦有不同的解決方法，Fish就自言：「以前我係咩都想自己解決嘅人，壓力大會發噩夢，出專輯時亦試過壓力大到瞓覺出咗一身汗，要換衫先再瞓過，而且磨牙磨得好緊要，嗰時脾氣都差啲，依家就學識約朋友放鬆，等朋友幫我解憂，而老公亦係我重要嘅傾訴對象，係情人知己！」
採訪：音樂組