吳卓羲嫌徐子珊冇feel
吳卓羲近期異性緣不俗，先後與徐子珊、馬賽、張馨予等名字扯上關係，頓變姐仔殺手，阿羲笑言並未為此構成壓力，更不會與她們斷絕來往，心懷正念的他還逐一細說三位緋聞對象，原來統統不是其Cup Of Tea！
無綫小生吳卓羲於劇集《點解阿Sir係阿Sir》與一班後生仔女合作，雖然只30出頭，但從拍攝過程已感受到與他們有段距離，亦令他回憶起讀書時片段，笑言求學時校規甚嚴，與新一代相比有天淵之別，阿羲還自爆中一時曾暗戀比他高年級的風紀師姐，不過當時因膽小不敢主動結識，結果浪費了機會。
談到現實生活，吳卓羲最近備受緋聞纏身，無端端跟徐子珊及馬賽扯上關係，阿羲坦言與子珊分屬好友，六年前於對方處女作便開始合作，見證她的成長，現在已經稱兄道弟，他說：「睇到佢性格係點，大家又同經理人，合作機會自然多，私下通電話咩都會講！不過唔會講識咩男仔，咁當然佢講我會聽，因為我都八卦，（會唔會變情人？）我份人好得意，如果鍾意個女仔，要有咗第一個感覺先，同子珊識咁多年都係朋友feel，所以唔會囉！」
願公開女友
至於馬賽，阿羲表示只曾與對方合作過一劇，傳緋聞可真莫名其妙；那曾上過他家的張馨予又如何？近排又被指穿情侶衣服及波鞋，阿羲聞言即一臉冤枉謂：「對鞋係Sponsor架！咁啲衫來來去去都係嗰幾個牌子啦！唉，係咪藝人就唔可以有女性朋友？唔可以坐隔籬？呢個根本就係配套，所以依家盡量都唔同女仔單獨出街，但係鍾意嘅女仔就會公開，（圈中人都得？）你鍾意佢就唔會理，我信自己感覺。」
文：影視組
攝：李柏儒
服裝：izzue
場地：皇家太平洋酒店堤岸酒吧及餐廳