新西蘭初體驗 周家蔚跳飛機減壓
周家蔚（Janet）雖然跟男友洪天明給人感覺老夫老妻，但其實她只是廿多歲女，當她首次踏足新西蘭這個年輕人地方，即時壓力全消打回原形，還大玩刺激玩意「跳飛機」，一嘗高高在上的快感！
無綫藝人周家蔚早前到新西蘭拍攝旅遊特輯，談到那十八天的行程，她以「好開心」三個字來形容：「真係好好玩！未去之前，冇乜特別留意呢個地方，印象只係喺澳洲隔籬，同澳洲應該差唔多，就好似美國同加拿大咁嘅關係，但原來新西蘭人最唔鍾意、最鄙視人哋咁睇佢。」
女孩子對政治沒興趣，但說到新奇刺激的玩意，Janet即時變得雀躍：「嗰度真係好多嘢玩，大自然又靚，好多唔同國籍嘅人嚟旅行做嘢，即係Working Holiday，做完嘢賺到錢，邊留低邊玩，玩完再去第二個地方再賺過再玩過。」Janet在一個莊園，遇到位中國女孩摘車厘子賺錢，時薪有七十多元港幣，做了兩星期後便露營釣魚去，十分逍遙，Janet說：「做侍應嘅都係咁賺錢咁玩，最適合讀完書又未搵到工，想見識下嘅年輕人，邊闖邊學英文。」
景色宜人
選過港姐，Janet總算見識過，但新西蘭仍有地方吸引Janet：「一落機就見到大座山，真係靚到呆咗，之後每日不停咁嘩嘩聲，嗰度冇高樓大廈，更冇空氣污染，只有靚海靚山大草原，咩生活壓力都冇。」Janet還大膽玩跳飛機（跳傘），開心得連畏高症都忘記了，問到會否跟天明來度蜜月？她笑言不一定要度蜜月，但可跟伴侶再玩一次跳飛機。
文：影視組