糖妹文靜宅女 糖兄打拳躁狂
組合糖兄妹風頭強勁，成員糖兄糖妹一作一唱，非常啱key。不過他們空閒時的活動類型相差甚遠，糖妹喜歡留家煲碟睇戲，名副其實宅女一名，糖兄則愛打泰拳，更會大叫「死啦」發洩壓力。雖然喜好不同，但相信亦是二人在工作上互補不足、擦出火花的主要原因。
新一代宅男女神糖妹（黃山怡）平時愛窩在家中煲碟，雖然自嘲宅女，不過她亦喜歡入戲院支持電影業。她謂：「我最鍾意睇科幻片。（最近睇咗邊套？）《雷神奇俠》！我幾鍾意Super Heroes（超級英雄），我特登睇埋字幕之後嘅片段！套戲講所有英雄聯手，好正呀！」
匿名寫網誌
除睇戲外，糖妹也愛看書：「我成日去旺角啲樓上書店，買啲減肥書學減肥，又會睇下食譜學煮嘢食！」另外，糖妹有寫網誌的習慣，不過現在和以前不同，不會公開自己身份，只想自己一個人抒發心情。
而負責作曲、玩樂器的糖兄（阿峰）原來和糖妹相反，熱愛動態活動，近日更迷上打泰拳。糖兄說：「打拳係減壓妙法，我會大叫『死啦』咁打落去，用嚟紓緩工作壓力。」問到有沒有因此受傷？他說：「有，有次做引體上升，我好辛苦咁做咗幾吓，搞到第二日隻手用唔到力，影響彈結他。不過其實我哋都唔會打得太激。」糖兄坦言選擇泰拳只因「硬橋硬馬」，既可以練反應，又可以減肥：「我想增強自己意志力，變得更man！」
文：音樂組