蔡少芬剖腹誕9磅4大隻妹
恭喜！恭喜！蔡少芬（Ada）前日剖腹誕下9磅4安士囡囡，張晉為女兒取名楚兒。由於楚兒「太巨型」，前日入院的Ada經過催生後，最後醫生建議剖腹分娩，母女平安，一直陪產的張晉感動到眼濕濕，而臥床的Ada看見新生女兒大叫Amazing，更流下喜悅之淚。
蔡少芬原定預產期為五月十七日，但前日Ada開始娠痛，故提早了六日到山頂嘉諾撒醫院待產，曾有心願親身感受生產過程的Ada，因未能順利催生，經醫生建議下最後開刀分娩，BB女終在下午五時十一分出世，重9磅4安士，取名為張楚兒。Ada昨日在微博亦有公開喜訊，並上載了一家三口的照片！
5月11日5時11分生
剛為人母的Ada，感到小生命來臨很Amazing，而陪產的父親張晉望着巨B女開心到笑不攏嘴，更形容為很堅強的女生，因為初生B女沒有經常大喊，手、腳又很粗壯。Ada揀選的山頂嘉諾撒醫院，亦屬星級分娩醫院，過往有女星邱淑貞、陳慧琳等於該醫院生產，最低消費亦要港幣十萬元起。
張晉昨日在下午五時半左右，在女親友陪同下在醫院樓下接受訪問，初為人父的他甫開口便多謝大家關心，期間又豎起拇指，又合十鞠躬，表現得很興奮。張晉稱：「母女平安，BB女出咗世啦，Ada係尋日入院，佢預產期係5月17日，之前周刊都寫錯晒，我見佢個肚咁大咪尋日入院催生，好巧合，最後BB女喺5月11日5點11分出世，重9磅4安士，相信係全醫院最重嘅BB。」
陪入產房的張晉，眼見Ada生產過程大感做媽媽很不容易，誓要對老婆更好，當護士抱BB女過來時，張晉自爆已眼濕濕，並指Ada亦開心到喊，問到女兒似邊個？張說：「嘴似爸爸，頭髮就似媽媽，又有美人尖，（改咩名？）Ada想改單字，我就想要個『楚』字，因為要BB女清楚了解上帝嘅真理，最後名為『楚兒』，而英文名就叫Zoe，代表生命意義。」
暫不開工陪伴老婆
Ada媽媽已到醫院探望，問到張晉是否雙方家長已到院探望？他說：「應該嚟嘅都嚟晒，（幾時出院？）未有咁快，我都未有咁快開工，陪吓老婆先，（Ada做全職家庭主婦？）佢唔可以安定落嚟架……等佢休養後，估計會出嚟拍嘢！」
此外，昨晚七時多張家輝亦前往醫院探Ada，二人早於無綫劇《天地豪情》合作時而成為好友，家輝說：「探完Ada又睇過BB女，可能啱啱出世，BB女同阿媽一個餅印，（教佢湊女心得？）之前見面傾過，（送咩？）遲啲先，等佢出院先，我哋由《天地》合作就識到依家，大家都各自有自己嘅BB啦！」
文：影視組 攝：追蹤組