林司敏素顏夠殺導演讚

江若琳師妹林司敏（Ciwi）在新片《B+偵探》中需要素顏上陣，幸好她平時護膚工夫做足，就算素顏都見得吓人，她說：「因為我個角色較為滄桑，初頭試晒妝後導演唔滿意，結果將妝逐樣落掉，最後變咗冇化妝導演反而收貨。導演話要抹走晒啲o靚妹味道，唔需要有任何氣息，希望唔會引起觀眾不安啦。」

Ciwi過往曾在電影《童眼》中，化上鬼妝以恐怖造型示人，她笑說：「都唔知點解咁啱，《童眼》要化鬼妝講我畀鬼上身，今次就連鬼妝都冇得化，要以無妝示人，導演真係睇得起我嘅樣。」

林司敏身為江若琳師妹，閒時都有向師姐請教演戲心得。

在新片中以素顏上陣的林司敏，笑言導演睇得起她的美貌。

泰國拍攝心寒

為了拍攝新片，Ciwi跟隊到了泰國取景，她在當地的十多日行程中，均一個人住一間房，自己也難以想像為何這樣大膽，她說：「間酒店不時都有裝修工人走嚟走去，好似就要拆咁。有次夜晚返酒店房，見到同層其他房都打開晒門，間間房都冇人住，我懷疑成間酒店得我一個，諗起都好心寒。」林司敏在戲中需要以普通話講對白，已獲專業普通話資格的Ciwi坦言大派用場，她說︰「同個內地女演員對戲都得心應手，反而導演彭順嘅廣東話就不時鬧笑話，我哋仲笑佢有自己嘅個人風格。」

採訪：影視組

髮型：Vanessa Kong @ HAiR

服裝：HYOMA 、CHOCOLATE