樂瞳唔買名牌拒援交

樂瞳、蔣家旻、林秀怡及沈愛琳在劇集《點解阿Sir係阿Sir》中扮演曳學生，四女的學生妹造型深受宅男喜愛，當中戲份最多的樂瞳更彈出成為新網絡女神！

唔怕粉絲走

提到求學時的難忘事，她們異口同聲表示並非奀皮一族，斯文的樂瞳更與惡女角色鍾家寶（中女）完全相反，當年更是被圍攻的對象：「有個學期我係咁畀同學鬧，我驚到匿埋廁所喊，佢哋仲鬧緊！（為咗咩事？）唔記得喇！都係啲無聊事，不過之後又Friend番，女仔係咁善變。」

劇中樂瞳為買名牌袋不惜做援交，但她表示絕不認同：「我冇乜購物欲，一定唔會為咗買名牌出賣自己身體！」問她會否擔心巴辣角色嚇走fans？樂瞳淡定說：「唔會，佢哋知道我真人唔係咁，之前都係做啲文靜角色，今次難得咁放，我出盡力咁演，不過睇番都覺得有啲Over！」

樂瞳（中）在劇中蝦蝦霸霸，終被蔣家旻（上排）、林秀怡（左一）及沈愛琳夾攻「報復」！

活潑的林秀怡（左）不時整蠱老師，蔣家旻則經常上堂發夢。

家旻愛夢遊

蔣家旻表示求學時見識到不少同學的「惡行」，但自己只是旁觀分子，最曳只是上堂夢遊，但亦不時被「掟粉刷」，認真慘情！至於沈愛琳也經常被欺負，但加入消防局的訓練營後即令「肆虐者」改觀：「我哋要一齊訓練體力，最後我攞到金斧頭，佢哋就唔敢再蝦我。」個性活潑的秀怡當年已是班中的開心果，並承認曾整蠱老師：「我會突然對住老師唱歌，搞到佢哋O晒嘴，但都好錫我架！」

文：立影

攝：劉智源