RubberBand重拾童真谷靈感
四人樂隊RubberBand完成五場演唱會後，又馬不停蹄籌備新碟，為帶給樂迷聽覺新享受，他們搜羅多款奇異樂器，勢為新曲增添另類元素，日前四子抽空抖抖，大玩一餐重拾童真，叉足電準備迎戰！
RubberBand早前推出致敬專輯《Dedicated to...》，向對影響他們音樂歷程的歌手和音樂人致敬，下一張「E」字頭大碟將回歸原創，結他手阿正最近為樂隊購入新樂器：「咁啱有個朋友放Tabla鼓（印度敲擊鼓），我就決定買，因為個鼓喺香港好難搵。」四子即將啟程往中東地區拍特輯，乘機找尋創作靈感，主音6號說：「我哋嘅音樂一向係較南美洲、非洲風格，嚟緊會去土耳其，睇吓會唔會發掘到新嘢！」
即興露兩手
日前RubberBand趁工作空檔，齊齊去香港迪士尼樂園玩餐飽，鼓手泥鯭及結他手阿偉更即興露兩手，跟樂園鼓手表演敲擊樂，引來不少遊人圍觀，他們玩作一團相當合拍，四子坦言由於平時工作見得太多，私底下都不會常見，盡量抽時間陪家人，有穩定女友的6號表示堪輿學家麥玲玲建議他們今年拉埋天窗，就連泥鯭亦舉腳贊成：「今日唔知聽日事，唔應該因為事業阻止自己嘅諗法！」
文：專案組
攝：黃叔榮
場地：香港迪士尼樂園
髮型：Mad Ho@IL Colpo
化妝：Maggie