李嘉欣清除腎石三動手術

李嘉欣昨日以亞太區代言人身份出席活動，穿上紫色斜膊露肩裙，現身產後第一個工作，身形與產前沒有分別，可謂弗到漏，同場還有「翻版徐子淇」鍾浠文，嘉欣謙稱現在體重比未生前還有幾磅要追，只是衫靚才顯得她瘦，問她生完BB有無餵人奶？嘉欣終自爆懷孕期間手術之謎：「醫生唔建議我餵人奶，因為我懷孕期間可能補鈣吸收太多患咗腎石，由於當時懷孕八個月，唔可以落麻醉藥同照X光，所以接受咗一次駁導管嘅手術，都算係大手術，直到生完，最近再做兩次手術，一次攞番支導管出嚟，第二次就係清除腎石，依家已經完全好番晒。」

再追一個睇天意

5月19日嘉欣會為兒子搞百日宴，她呼籲親友將送禮的錢捐往她設立的「JMJ慈善基金」，記者問她老爺奶奶有沒有率先捐幾億？嘉欣表示：「佢哋會捐，但銀碼唔講。」母親節將至，剛為人母的嘉欣指暫時沒有特別感受，因兒子還細未識畫卡；至於生完BB之後，老公有無獎勵，她表示：「我哋唔講呢啲，平日大家都好愛惜對方，BB係大家最大嘅禮物。（老爺奶奶有無獎勵？）唔需要。（會唔會再追一個？）睇上天安排，唔係自己決定，（有無計劃？）無，有一個都已經好滿足。」

老公錫仔唔呷醋

今次乃嘉欣產後第一炮工作，她指未來一個月要飛多五、六次，拍廣告兼做代言人，問她生了BB之後在老公心目中的地位有否改變，她表示：「唔知，但我依家會將仔仔放喺第一位，不過，我相信我喺老公心目中都有相當地位，就算佢好錫個仔，我都唔會呷醋。」

文：影視組