祖兒現場直擊夢成空

威廉王子與準王妃凱瑟琳的世紀婚禮成為全球焦點，有份獲邀今日到倫敦西敏寺大教堂見證世紀一刻的貴賓非富則貴。連美國總統奧巴馬都冇份出席盛事，「萬人迷」碧咸和Victoria夫婦是嘉賓之一，雖然碧咸下周一亦要應付所屬球會洛杉磯銀河作客對FC達拉斯的比賽，前日仍舉家飛返倫敦賀好友威廉王子小登科，認真唔話得！

威廉王子05年開始擔任英格蘭足總會長一職，與球圈人士關係密切，去年世界盃，親身到南非為國家打氣的威廉王子與碧咸一見如故，加上二人同時為英格蘭申辦2018年世界盃做游說工作，彼此私交甚篤。出發前，碧咸在Facebook上載視頻祝賀是次英國皇室盛事，他說：「好開心被邀請，我哋國家好需要呢啲盛事沖喜！」懷孕已七個月的Victoria為了今天婚禮穿甚麼而大費周章，因為之前準備的十一條裙都不合心意，最後選擇了與自己同名牌子的長裙盛裝出席。

驚畀王子fans踩扁

身在倫敦的容祖兒，原本打算演唱會後走到街上親睹王子大婚，可惜經理人霍汶希以安全理由，打消了祖兒的念頭，她接受長途電話訪問時說：「我聽日（今日）會返到香港，始終係難得盛事，本來都想睇埋王子大婚，不過又驚太多人，又驚畀王子fans踩扁喎，我又帶埋媽咪一齊，都係唔冒險喇，希望可以趕得及返屋企睇！」祖兒又表示縱使威廉王子有脫髮迹象，但依然是她心中的白馬王子，問有否想過做王妃？她笑說：「冇可能啦，呢一世都冇機會，連入王宮嘅機會都冇！」

文：專案組