何超儀患畏B症最怕「意外」

何超儀、楊采妮、內地演員王剛、李妮等昨午於北京故宮出席《微笑行動中國基金二十周年北京慈善晚宴2011》活動，之後再出席晚宴，而原本李亞鵬亦答允赴會，但公關昨晚接到李亞鵬助手通知，李亞鵬臨時有事未能出席晚宴。

超儀昨午受訪時談到生育問題，她斬釘截鐵表示：「暫時唔想生，要排吓期先，一直有養狗仔，當佢親生仔一樣，見到啲朋友，為照顧BB付出好偉大，我無咁偉大嘅行為，亦都唔想有意外嘅偉大，最好係有計劃，依家我有畏B症，勁過畏高同畏蛇，其實最好領養，領養大人更加好，最怕聽啲BB話，領養嘅話，都要領啲識得傾偈。」

趙曾學韞（左）與超儀攬到實一實合照，十分友好。

楊采妮打扮性感出席活動，令人眼前一亮。

輸影后不敢稟父

超儀早前於香港金像獎敗給劉嘉玲，失落影后，她直言暫時未見到爹哋，亦未敢告訴對方實情，超儀表示：「都唔敢打畀佢，預備買定cake，等爹哋唔記得問番我。」談到微笑行動，超儀坦言很欣賞基金會的一條龍服務，除了會安排兔唇兒童做手術外，還會安排導師到醫院作言語治療，至於原本會見到李亞鵬，超儀表示：「我識王菲，但唔識李亞鵬。」

同場的楊采妮透露正與超儀拍攝同齣電影，在戲中將由四十歲演到六十，是演技大挑戰。早前，有指采妮與前男友邱韶智復合，她說：「咁多年我嘅感情事都係低調處理，所以無嘢好講，我同對方（指邱韶智）未入行已經識，依家係好好嘅朋友。」

微笑行動基金會主席趙曾學韞昨午接受訪問，被問到「微笑行動」與王菲、李亞鵬的「嫣然天使基金」幫助對象都是兔唇人士，趙曾學韞指大家不會存在競爭，三年前，知道王菲、李亞鵬搞「嫣然」，都立即主動透過劉嘉玲聯絡他們，李亞鵬還去參觀過杭州醫院，大家是很好的合作夥伴。