豆斗拖女撐夫 老闆娘歸位

邱淑貞（豆斗）自嫁給沈嘉偉後，一心相夫教子，行事作風變得相當低調，幾乎絕迹公開場合，就連老公旗下的I.T活動，甚至是公司於08年舉行的20周年派對，身為老闆娘的她亦未有出席。但前晚I.T希慎道1號開幕派對上，她卻罕有地親身到場支持老公，長女和二女也有出席，而對上一次她公開撐老公場已是十年前的事。

趁機跟摯友相聚

據悉，這次豆斗除了是為撐老公場之外，也因為當晚很多出席的嘉賓包括與老公陳可辛及女兒一家三口赴會的吳君如、劉嘉玲、張栢芝，以及與老公張智霖（Chilam）拍拖到場的袁詠儀（靚靚）等均是她的摯友，豆斗亦想趁機一聚。她和君如、嘉玲以及栢芝在公關的拉攏下合照，君如更大叫：「我哋四個靚女一齊影相喇！」悉心打扮的栢芝則在儀式完畢後經秘道離開。

沈嘉偉旗下新店正式開幕，出席嘉賓者眾，門外更擠得水洩不通，熱鬧非常。

與沈嘉偉老友鬼鬼的余文樂（左），樂於捧老友場。

靚靚冇鬧Chilam

靚靚表示與老公Chilam是抱着免費的心態來支持老友，她說：「不過嘉偉話唔得，一定要封番封利是。見到個老友愈開愈大，我哋都覺得好光榮。（有冇Sponsor你哋？）張生有Sponsor，因為佢付出太多時間，我會選擇性返屋企，得個大嘅Discount，但好朋友冇計。（會唔會入股？）我有買佢公司隻股票㗎，都買咗可觀嘅數字。」提到Chilam曾表示若靚靚減肥成功便會送她一個手袋，靚靚說：「仲差五磅，真係好難減，Chilam都有陪我跑步。（減完就生BB？）我寧願要健康，甲狀腺病手尾好長，要醫好先，等身體好番先再諗生BB。（有報道話你喺街喪鬧Chilam？）可以話我喪哦或者喪講，但唔係喪鬧，我有好多嘢要報告佢知，同埋鬧佢冇用，佢當我唱歌，講多幾次佢先會記得。」

上山詩鈉的女兒已長得亭亭玉立。	吳君如、陳可辛與女兒陳是知一家三口出席。	Chilam一身潮服，與靚靚捧好友場。

文：名人組