蔡少芬扭計搵老公送珍珠
即將榮升媽咪的蔡少芬（Ada），為迎接新生命的降臨，近日緊張得提早執定「走佬袋」放在車廂內。閉關養胎了一段日子的Ada，前日挺着巨肚與老公張晉外出行街睇戲解悶，有助紓緩產前緊張心情。
Ada將於下周入院生B，原本身在內地工作的老公張晉，最近亦已返港陪老婆待產，兩公婆面對人生第一個愛情結晶品的降臨，心情既緊張又興奮。臨盆在即的Ada，連日來都在其位於元朗的錦綉花園閉關養胎，甚少外出行街，悶到心癢癢的她，於前日早上在微博向老公撒嬌：「今日無論如何，我一定要飲珍珠奶茶！」向來愛錫老婆的張晉，惟有載着肚大如籮的Ada離開寓所前往元朗市中心購買。
動作敏捷心情靚
抵達後，張晉將座駕停在一邊，戴上黑超、穿上大肚婆裙的Ada則小心翼翼落車，雖然Ada挺着巨肚，但動作卻十分敏捷，之後前往購買她期待已久的珍珠奶茶。當發現本報記者時，她即笑笑口打招呼，又向記者展示手上的珍珠奶茶，她還一口氣啜了數啖，一臉滿足。難得出關的Ada，隨即再往附近買雞蛋仔醫肚，之後再往銀行辦理私務，逗留約15分鐘才返回車上會合老公。以防BB提前搶閘出世，老公已為Ada做足準備，執定入院的所需用品放在車廂內。
車內放定日用品
其後他們直駛九龍區一個大型商場行街睇戲，腹大便便的Ada，又伏在老公肩膊上晒恩愛。在排隊買飛時，見Ada不時叉腰，問她是否很累？她說：「依家個肚咁大，有時條腰都好攰。（下周產女？）就快喇！我都執定入院啲嘢放喺車，驚隨時生得，真係又緊張又興奮。但係我幾日都留喺屋企真係好悶，今日特登同老公出嚟行街，當做吓產前運動嘛！」她又透露近期胃口大增，無時無刻都食唔停：「我頭先已經食咗早餐，跟住仲食埋雞蛋仔，依家又好想食嘢喇！」
文、攝：追蹤組