G.E.M.跳鋼管舞挑戰性感

G.E.M.昨日身穿性感小背心到排舞室為五月中的紅館個唱排舞，問到她的演唱會中有否性感環節？她表示性感可以表現在態度、眼神上面：「如果冇態度，唔着衫都唔會性感啦！（歌衫會唔會性感？）我其實係活力型，不過會試吓，睇吓可唔可以有突破！（男友林宥嘉有冇讚你性感？）你問佢啦，佢有讚我嘅音樂，我睇報道先知咋！」

加場銷情佳

另外，她自爆很想開演唱會part 2：「因為加場15分鐘就賣晒，依家好想再加場，睇吓可唔可以開part 2啦！」

肌肉變結實

明顯瘦了的她特別跳了一段鋼管舞，當中更有被舞蹈員抬高的危險動作，令她一度表現緊張，更大叫：「冷靜啲！」問到她的身形，她說沒有瘦，只是肌肉變實：「夜晚戒澱粉質，早午就食穀物加奶。（腰圍？）23吋半，（上面呢？）冇度，唔係主要減嘅範圍，哈哈！」

文：音樂組