Kelly操刀剪出母子裝
陳慧琳（Kelly）走出小產陰霾，昨日親筆撰文多謝各界關心，日前她還帶「蝦餃仔」劉昇到沙灘嬉戲，陪玩的Kelly流露燦爛笑容，看來蝦餃仔確是她最好的「心靈雞湯」。蝦餃仔跟媽咪小時候餅印一樣，Kelly還親手幫乖仔剪「冬菇頭」，母子情深。
自從失去人工受孕的孖女後，承受小產之痛的Kelly一直留家休養和全心照顧蝦餃仔，經過個多月休息後，她終於走出陰霾，昨日親筆撰文多謝大家關心：「呢個幾月嚟收到好多慰問，我想喺呢度多謝每一位親戚朋友、歌迷、傳媒，同埋所有關心我嘅人為我帶嚟嘅祝福。大家對我嘅關心，我收到晒喇！呢排身體已經好咗好多，大家唔駛（使）擔心！」
真情流露
Kelly日前還帶蝦餃仔到沙灘玩樂，身穿長褸的她雖然戴上黑超，但陪兒子玩時流露出燦爛笑容，足見她身心都已康復，看來蝦餃仔的確是她的「心靈雞湯」。她說：「最近劉昇大個咗好多呀！愈嚟愈多表情，古靈精怪，你哋話係咪呢？過幾日我會開始工作，到時又可以同大家見面喇！到時見！」
1歲9個月大的「蝦餃仔」精靈活潑，跟小時候的Kelly餅印一樣。據Kelly助手透露，當日是蝦餃仔第一次去沙灘玩，非常興奮。對於剪了冬茹頭的蝦餃仔被指似「萬寧妹妹」，Kelly助手說：「蝦餃仔嘅髮型係Kelly親自剪o架！佢話囝囝愈大愈似自己細個嘅樣，所以剪埋一個髮型。」
後日復工
Kelly將於後日復工出席金至尊旗艦店剪綵，問她心情如何？助手說：「平常心，佢會接受訪問，有晒心理準備。嚟緊佢會開始做簡單工作，好似剪綵、錄廣東碟、出席時裝品牌活動。」
文：音樂組