劉嘉玲后來趕上心花放
劉嘉玲前晚終於零的突破，開齋成為香港金像獎「最佳女主角」，老公梁朝偉雖未能陪伴出席，但一早安排工作人員送上鮮花祝賀，冧得老婆風騷向記者大騷甜蜜訊息，更揚言要追上老公的影壇成績。
嘉玲憑英皇電影《狄仁傑之通天帝國》奪「最佳女主角」，身在內地的偉仔，已安排工作人員在後台送鮮花祝賀老婆。之前嘉玲答應如獲獎，便會公開老公傳給她的甜蜜訊息，嘉玲前晚履行承諾並說：「佢話無論結果如何，我都係佢心目中嘅最佳女主角。（好冧？）係。（偉仔未能分享喜悅？）唔緊要，係有啲可惜，不過世上係有唔完美嘅事，有時係有啲遺憾。」對於劉媽媽於她得獎時流淚，她相信媽媽是喜極而泣。
盼追偉仔影壇成績
嘉玲之後出席英皇舉行的慶功宴，她表示已收到偉仔的電話：「佢有睇直播，佢仲緊張過我。其實我同爾冬陞通咗電話，佢話專登唔放偉仔嚟，因為佢唔『老利』我，我話佢用心良苦。」她又指謝霆鋒很好，未來電影都靠這班年輕人接棒。
首奪金像獎影后的嘉玲坦言不會覺得自己完成任務：「我要追番偉仔，佢仲有康城影帝，有成十幾個獎，有排追。（個獎放喺邊？）我要擺喺佢所有獎嘅中間。（唔係送畀媽咪？）擺一晚之後就畀番佢。（得獎冇感動到喊？）可能年紀都有番咁上下，又咁多年，識得點去紓緩自己嘅情緒。又或者可能我反應慢，要等返到屋企靜落嚟先感受到份喜悅，依家仲暈緊，好似踩住舊雲。」
不加片酬盡力演戲
嘉玲又透露不會因此加片酬，會盡力演好戲。對於今次因拍導演徐克的電影而奪獎，問到日後可會優先選擇對方的戲？她指香港有很多導演都想合作。她於慶功宴逗留約四小時後，帶醉意並腳浮浮離開，期間碰見施南生和徐克，即與他們擁抱親面，之後便返回寓所。
心情繼續大靚的嘉玲昨早更於自己微博寫上《只記今朝笑》的歌詞，好友王菲留言指她入了仙境。昨晚上七時半，嘉玲與母親到銅鑼灣與朋友共膳，問到偉仔有何表示？她笑言對方很忙。
文：影視組 攝：追蹤組