葉慧婷唱出正能量
樂壇新人葉慧婷（YT）剛推出最新EP，原來她秘密訓練三年才正式出道，之前亦曾到過多個地方開騷「磨利刀」，她說：「去過加拿大、台灣同北京，好難忘去加拿大嗰次，因為舅父同婆婆都住嗰邊，佢哋仲緊張過我！」去年底，首次有個人歌曲的YT到尖沙咀一酒吧獻唱，喜獲不少fans舉牌支持，她更成功感動酒客：「開頭好多人仲玩緊骰盅，但慢慢開始全場靜晒聽我唱歌，好有滿足感。」
走活潑路線的YT堅持以歌詞傳達正確價值觀，望可帶出正能量：「新歌《新一天》就係鼓勵大眾要識放鬆自己，有fans話聽完好有動力，返工前一定要聽！另一首《蝴蝶飛》就係叫人喺短暫生命中做出精彩嘅事。」
場地：糖兄弟 化妝：Rin 服裝：Fiorucci