楊汀叮向Baby偷師闖影壇
模特兒楊汀叮去年推出教化妝寫真殺出條血路，今年決定搞搞新意思，推出另類旅遊書，她亦有意步師姐Angelababy後塵進軍影壇，由模界轉戰到大銀幕，現正努力物色心水角色。
楊汀叮去年花了四個月籌備教化妝寫真，今年決定轉出旅遊書，暫定會介紹澳門及珠海，日前她為卡通品牌PUCCA示範新系列時裝時，亦乘機向品牌設計師Kim Boo-Kyoung（Kim）偷師攞靈感：「我本身都鍾意設計，不過多數係憑空想像，真係畫出嚟就好難！」該品牌在韓國找來人氣組合Wonder Girls任代言人，Kim正考慮在香港或內地找中華代言人，又大讚汀叮着得好睇。
讚師姐獨立
另外，近來不少模特兒都從模界跳入大銀幕，汀叮的師姐Angelababy更可算是當中的表表者，汀叮亦有向Baby請教拍戲心得，之前Baby去雲南拍戲得了高山症，令汀叮擔心不已：「佢要不停吸氧氣同食藥，不過佢一向都好獨立，可以照顧自己。」原來早前已有幾間公司搵汀叮拍戲：「要睇經理人決定，我都有跟過張達明學戲預備定！」
採訪：專案組