曼玉泯恩仇貼嘉玲封后

今屆金像獎影帝、后繼續爭崩頭，從未染指金像影后的劉嘉玲雖然奪獎呼聲最高，不過何超儀、湯唯、薛凱琪及楊千嬅的實力亦不能小覷。不過，嘉玲看來冇有怕，因為除獲影帝老公梁朝偉支持外，就連宿敵兼過氣情敵的張曼玉也開口力撐她封后。曼玉前晚偕德國籍男友Ole Scheeren十指緊扣出席北京的品牌活動，與Ole打破分手傳聞，伊人心情明顯靚絕；同場還有韓國型男元斌、范冰冰、閆妮、李冰冰、陳坤、王學圻等紅星捧場，場面熱鬧。

沒原因只要信

闊別香港影壇多年，曼玉笑言因有很多提名作品未看過，所以對今屆金像獎是零概念，更不願胡亂猜測賽果。但當得知嘉玲有份角逐影后時，她即拋開過往的「恩仇」，二話不說力撐嘉玲封后：「冇任何原因，就係相信佢，希望嘉玲可以攞獎！」

為了安撫影迷，曼玉強調自己並沒隱退的意思，只是前些年拍電影太多，所以現在如果再拍電影，會慎重選擇劇本，她說：「如果有打動自己嘅劇本，當然會好好考慮。」談到與男友的感情，她說：「我自己並唔願意高調公開戀情，而係每次談戀愛都避唔到傳媒嘅追蹤，如果你哋拍到，之後問我，我係唔會講大話！」

評審各有心水

賽前，嘉玲心情相當輕鬆，又於微博上載拍牛奶飲品廣告的花絮。她接受亞視訪問時表示，演繹武則天一角要花相當心思，對角色愈研究，就愈着迷，故對於奪獎信心十足。

此外，兩位今屆金像獎專業評審團成員張達明和杜惠東，對影帝后各有心水，達明說：「影后我會揀劉嘉玲，影帝會係學友，兩個都做好多年戲，好有影響力！」杜惠東說：「影后我揀超儀，影帝就揀梁家輝！周潤發贏咗咁多年，係時間要畀吓家輝啦！」

文：專案組