微博留言惹是非 周柏豪洩憤劈冰濺血
周柏豪當日用《後援》歌詞在微博留言「開火」，本是形容與弟弟一齊打War Game，卻被指為何超雲向陳山聰宣戰，無端端惹是非。早前柏豪為該歌曲拍MV，導演似乎深明柏豪多月來被「屈氣」纏身，特別給他一幕「劈冰洩憤」，結果劈到出血！
導演為拍到最好效果，早已準備了多塊巨型冰柱讓柏豪「任劈」，在拍攝前他向工作人員笑說：「如果我有乜損傷流血，記得影低，上次我爆眼瘡隻眼流出血眼淚，咁恐怖都唔記得影呀！」
心情舒服晒
「好嘅唔靈、醜嘅靈」，拿着斧頭向冰柱不停喪劈的柏豪，被飛出來的碎冰割傷鼻樑流血，最搞笑大家都不急着為柏豪止血，而是大家拿着相機和手提電話，第一時間拍下這個「血的見證」，連柏豪都忍不住笑說「開口中」，柏豪謂：「劈嗰時係感覺到一舊冰飛埋面度有啲痛，但冇諗過真係會流血。（驚破相？）唔會啦，少少血，好小事啫。」提到當日《後援》歌詞鬧出是非？柏豪坦言：「唔係，係個誤會啫。啲是非完咗啦，唔關我事。（舒服晒？）可以咁講啦。」
連詩雅探班
除了玩劈冰外，柏豪為配合《後援》是送給入行以來朋友和歌迷對自己支持的一份禮物，今次請來新碟的音樂創作班底和好友演出，齊齊穿「斑馬紋外套」，實行親自「班馬」顯聲勢，而師妹連詩雅更做「外賣妹」給柏豪送上巨型Pizza探班，柏豪笑言：「斧頭再加埋Pizza．咁似卡通片『忍者龜』嘅。」
文：音樂組
攝：劉智源