呂晶晶朝九晚五 天地更演員扯火

呂晶晶與亞視執行董事盛品儒的「情侶」關係，在亞視已是公開的秘密。晶晶的「老闆娘」地位在公司穩如泰山。最近她在鄧特希新劇《親密損友》的開工時間可說是全劇最獲優待一人。有指晶晶除了可在星期六、日休息，平日拍劇亦是返寫字樓工時間，猶如OL返工放工。

敢怒不敢言

據知，晶晶曾呻拍劇時間辛苦，即人人自動波遷就她拍攝時間，但就將同劇演員的開工通告編排至「天地更」（即拍完頭場再等尾場開工），令很多人怨聲載道。同樣是亞姐出身的姚佳雯下午一時拍完頭場，便要等至晚上十時再拍同日尾場。作為新人的她得聞「老闆娘」獲優待，當然敢怒而不敢言。另一男演員快必（譚至德）的反應卻大得多，更三度為此與導演發生衝突，幾乎想向導演爆樽洩憤。現場目擊者高皓正和鄧特希擔心釀成血案，即衝前勸阻。

鄧特希昨日就此事承認在拍攝上，演員與劇組人員有不同意見，但對「老闆娘」晶晶獲厚待未有正面回應，但強調非刻意遷就：「其實通告唔係全部我排，都有助導、統籌做。（周六、日唔使開？）咁啱嗰兩日冇通告，我哋唔會刻意去就。（其他人有怨言喎！）我未收到投訴。（快必嬲到爆樽？）呢件事我都喺現場，冇咁誇張。最後都順利完成拍攝，況且導演都冇受傷。」而姚佳雯昨日亦承認返「天地更」，她說：「一、兩次啦！我第一次拍劇，唔覺辛苦，反而覺得幾好玩。」

返「天地更」的姚佳雯等到發呆。

高皓正曾目擊快必因呂晶晶獲厚待而扯火場面，即時出手勸止。

唔想咁辛苦

至於獲優待的晶晶昨日受訪時，反過來向劇組投訴自己開工時間長，更曾親自向助導了解。記者問她可有向「高層男友」盛品儒投訴？她笑說：「呢個係兩回事！（受到優待令到其他演員有怨言？）唔會啩！咁誇張？我都成日等啦！我都有『天地更』。（周六、日唔使開？）我係星期日病過先唔使返，我都想同鄧特希講唔好要我咁辛苦，我冇晒私人時間，約唔到朋友食飯。（冇得同盛生食飯？）唔係，我哋唔係拍拖！」

盛品儒昨亦稱不會過問公司運作：「冇特別遷就一個演員。（緋聞令到其他演員敏感？）有啲啦，我會小心處理。」

另外，亞視是非一籮籮！陳秀雯日前投訴拍完《法網群英》至今未收到百萬酬勞，亞視高層葉家寶表示之前已跟秀雯傾過，故暫不需要再對話。而陳秀雯被問會否正式入稟？她指正跟律師商討，如事件發展至這步亦沒辦法，訴訟費用是她首要衡量條件。

文：影視組