志偉贏頭馬帶挈老友發財

曾志偉昨日以馬主身份到澳門參與澳港盃，獲好友三哥苗僑偉、三嫂戚美珍及多位圈外朋友支持，結果其麾下馬匹「品自高」爆冷贏出，令志偉贏得數十萬元獎金，將於本周四（14日）生日的志偉，可謂雙喜臨門！

最緊要大家開心

志偉表示前一晚已跟好友到澳門食飯，而日前兒子曾國祥亦有為他慶祝生日，問到收到甚麼禮物？他說：「冇所謂！最緊要大家開心、身體健康！」三哥則說：「今次專登嚟捧志偉場戥佢高興，已經食咗飯慶祝佢老人家生日！」問到有否投注撐好友？三哥笑說：「有！100蚊啦！」卻被身旁的陳百祥（阿叻）踢爆他其實投注2,000元，而澳門及香港賠率分別是17倍及37倍，故三哥最少贏得3萬多元，甚至可能有7萬多元斬獲，問到會否打賞老婆？三哥只笑不語。

志偉贏馬，阿叻即上前祝賀。

志偉拉頭馬，大班老友撐場贈興，氣氛高漲。

阿叻夠擺結婚酒

阿叻表示今次是在澳門撞到志偉，知道對方拉頭馬，即開心得上前握手，他笑說：「有高人話佢隻馬會跑出，所以過嚟抽水，都有落注。（贏幾多錢？）夠擺結婚酒！」而一行人於賽事後繼續食飯慶祝。

文：影視組