近年轉攻內地拍劇登台吸金的陳小春，前晚內地登台期間被搶眼鏡，事後在微博留言呻下，竟被博友回應「活該」甚至爆粗留言，火藥味濃。但昨晨，該博友卻突然「自首」為醉酒失言而道歉，小春大讚：「有種！」
婚後努力吸金的陳小春，日前在北京出席新戲《鴻門宴》記者會，宣布與黎明和劉亦菲等合作，之後繼續內地登台賺人仔之旅。前晚他應邀到浙江登台，據知當他從後台步上舞台時，一名男觀眾突然衝上前，一手搶去小春戴着的黑框眼鏡，然後箭步離開。
小春呆了一下，無奈地上台繼續演出。散場後小春在微博呻了幾句，怎料被一名路過博友「Gossip」寸爆話「活該」更喪爆粗，小春火起回應，最後小春收口才告一段落。
昨日早上該路過博友「Gossip」留言向小春道歉：「昨晚說陳小春的不是……是在醉酒狀態留下的……按照我今天清醒時去分析昨晚的心態……估計是為了發洩當時在酒吧混亂場面的極度感慨……真誠的向小春同志say……sorry……」而小春則留言表示接受道歉。
昨日記者致電小春，身在天津的他勞氣地說：「事後我『邀請』呢位男觀眾上台，佢龜縮喎！最嬲係我畀人偷嘢，點解我畀人用粗口鬧，咩世界？佢鬧埋父母奶奶，黐線！要鬧就鬧我，唔可以鬧埋我阿媽！」火氣很大的小春被問到博友道歉一事，立即收火並笑說：「佢有種，我即刻『關注』佢，有責任感，可以做朋友！」06年小春亦曾在登台期間被搶帽子，昨日他無奈苦笑說：「我真係唔明點解啲人咁鍾意搶我身上嘅嘢！」
文：專案組