孔慶翔唱歌追夢不言棄

William Hung憑獨特歌技及舞步一度紅遍全球，近年他專注學業，並於去年八月畢業。日前他特意從洛杉磯返港，在夜店Dragon-i演出，問到會否再戰樂壇？他說：「呢啲好難講，順其自然啦，有啱嘅登台工作都會做，我主修數學，想做統計方面嘅工作。（數口精？）幾精架，都OK啦！」

金句影響新一輩

當年William Hung以一句「I already gave my best, and I have no regrets at all」贏得觀眾歡心，他直言金句對後生一輩有影響力：「人生最緊要冇遺憾，自己仲有好多嘢未做，我仲鍾意唱歌架！希望鼓勵到鍾意唱歌嘅人大膽去唱唔同類型嘅音樂，唔好放棄！」

揀女友首要真心

近年在美生活的他亦有留意香港娛樂新聞，知道Angelababy、周秀娜等o靚模：「都知道佢哋係邊個，幾好吖！」提到揀女友，他強調對方一定要真心愛自己。William Hung出道至今有不少新聞，問到會否自覺EQ高？他笑說：「都應該幾高嘅，我會將新聞當為動力，鼓勵自己，發憤做好。」

Profile

中文名：孔慶翔

英文名：William Hung

出生日期：1983年1月13日（28歲）

學歷：加州大學柏克萊分校畢業

簡介：為美籍華僑的William，於04年1月參加《一夜成名》（American Idol）憑一句「我盡咗力，冇後悔」贏盡民心，後一度回港發展，參演電影《我阿媽發仔瘟》及拍攝瘦身飲品廣告，其後推出首張個人唱片。

文：專案組