藍燕匿佛門閂電話
內地性感女星藍燕突然人間蒸發，杳無音訊，令蕭定一監製的新片宣傳計劃受阻，藍燕經理人前晚終於在阿一定出的最後限期前，尋得身在內地一所佛廟的藍燕，而自知闖禍的藍燕，昨晚即從上海返港向阿一解釋望能補鑊。
上海返港急解畫
藍燕有份演出的新片《3D肉蒲團之極樂寶鑑》上畫在即，偏偏她此時卻人間蒸發，甚至傳出已自殺身亡，即使監製蕭定一、經理人BoBo亦一度未能與她取得聯絡，直至前晚BoBo才搵到藍燕，指她在佛廟修行，未有開電話而弄成這樣，而藍燕心知事情鬧大很內疚，昨晚即從上海趕來香港，配合宣傳補數。
昨晚約九時在上海抵港的藍燕表示：「我去了禪修廿日，估不到鬧出風波，不過，事前已跟經理人公司請假，批准放才放假的，但事情弄至這樣，已跟阿一解釋，互相亦諒解，（炒作新聞？）我拍了多部戲如要炒作早就多的是，（可覺今次令工作失誤？）宣傳我不介意，但影響我聲譽或要造宣傳的話，則要互有默契。」
周防雪子不言休
而日本ＡＶ女優周防雪子昨日抵港為電影宣傳，對於藍燕失蹤，她透過翻譯說：「完全唔知呢件事，搵番未？（日本同鄉原紗央莉退出ＡＶ界？）唔知喎！我同佢好熟，近排有打電話畀佢，但搵唔到佢，佢係一個有唔開心都唔會講出嚟嘅女仔，聽到呢個消息，感覺好衝擊！咁咪得番我？好寂寞！（你有冇因為地震想退出？）冇，我依家知名度唔高，希望用僅餘力量幫災民重現笑容，之前我喺網誌募捐。（你拍《肉蒲團》有冇情緒問題？）我拍得好開心！」
文：影視組