李心潔無法抽離擔心黐線
「鬼后」李心潔婚後再與老公彭順合作拍新戲，因壓力太大而爆煲。在泰國開工期間一度要停工紓緩情緒，心潔直言今次難於抽離角色，自己都擔心會黐線，幸得老公在身邊支持，日前她在港開工，情緒繃緊得身邊人都感受得到，實在令人擔心。
李心潔拍鬼片起朵，早被冠以「鬼后」之稱號，她對自己的要求亦愈來愈高，不少好戲之人都試過抽離不了角色，精神陷崩潰邊緣，有些更會患上抑鬱症，好像舒淇就曾透露有此情況，需要一段時間才能「平復」。
心情沉鬱唔識笑
心潔最近同樣遇上類似情況，她接演了老公彭順執導的寰宇3D新片《夢遊》，飾演精神分裂病患者，此片是心潔與彭順婚後首部合作作品，理應比以前更得心應手，但因心潔要求高，令到情緒相當波動。
日前影片在港開工，整個過程心潔都顯得很沉鬱，不苟言笑，一張臉拉得繃緊，在場人士都看得出她的緊張，而她每完成一個鏡頭，定必走到電腦螢幕前細看playback，參詳自己的演出，比導演老公彭順還要緊張！
心潔自爆今次演精神分裂者，出現了無法抽離角色的情況：「唔使做戲時我都控制唔到情緒，收工後情緒好耐都平復唔到，返到屋企同老公大發脾氣，好在佢好了解我同埋我嘅心情，不但冇怪我，仲出言安撫成日講笑話氹我開心。呢段時間真係好辛苦，我有擔心過自己會黐線，呢種情緒亦會影響到其他人。」
楊采妮曾經此苦
因為情緒太波動，心潔在泰國開工期間，曾出現「爆煲」要向劇組要求停工一日，讓她抖抖氣，劇組的人亦很支持她，陪她大吃大喝兼踩單車等，望能助她盡快走出心理上的陰霾。
同戲的楊采妮對心潔這個情況感同身受：「拍《父子》時我都試過抽離唔到，無緣無故成日喊。今次飾演嘅角色要承受喪女之痛，沉重嘅感覺又返嚟，但我開始識得點開解自己，會同人講吓笑、傾吓偈，盡量唔會將工作情緒帶返屋企。自問演技未夠爐火純青，我唔會同期接兩部戲，寧願一部接一部。」
文：影視組