陳豪為咖啡推劇 監製扯火

古時有皇帝「不愛江山愛美人」,現在有陳豪「愛咖啡寧棄江山」!一向聽聽話話的陳豪,近日為了完成開咖啡店的夢想,突然辭演無綫新劇《樂府藏龍》,遂引起監製張乾文極度不滿,認為陳豪提出的「要親自看舖」的理由太牽強,忍不住出言炮轟,而無綫高層樂易玲為此成為磨心。

「愛啡如命」的陳豪近月為在馬來西亞開設首間的咖啡店,奔波兩地,所以本來去年十一月他已答允接拍張乾文監製,於今年五月一日開拍的卅集古裝劇《樂府藏龍》亦於上月提出辭演,理由是他要在馬來西亞看舖幾個月,更獲藝員部同意放人,令張乾文被迫接受,惟有陣前易角。

不放棄演藝事業

對於為咖啡辭演新劇一事,陳豪接受本報電話訪問時承認:「拍唔到套劇我都好遺憾,但係撞咗期我都無辦法,我都知監製唔開心,已盡量向佢同高層解釋,佢哋都知我一向唔會推劇,希望佢哋可以諒解,(係咪為咖啡犧牲演藝事業?)又唔好講到咁誇張,拍戲始終係我正職,開咖啡店係我少少嘅夢想,(要看舖唔接工作損失大?)唔……會有安排嘅,但我一定唔會唔拍戲。」

至於無綫製作資源總監樂易玲對今次成磨心感到十分無奈,她說:「陳豪係同無綫請緊假,但假期未正式批,本來佢係趁呢兩個月空檔搞咖啡店,但間舖遲咗交吉,撞咗拍劇個期,佢曾經問劇組可唔可以等佢一個月,但無可能要廠期同咁多演員就佢一個,所以惟有向監製辭演,我都知監製一定會唔開心。」

樂易玲慘成磨心

樂易玲又透露曾勸陳豪以拍劇為重,可惜未能勸服對方:「我當然有勸佢,但每人有自己選擇,咖啡係陳豪條命,佢曾經講過咖啡係佢嘅終身事業,對陳豪嚟講,咖啡真係緊要過女人,呢件事上面我都好為難。」

至於會否擔心陳豪推劇開先例,令其他演員有樣學樣?樂易玲說:「我諗其他演員都會明白,陳豪今次唔係求其編一個理由出嚟,佢真係好緊張間咖啡店,大家都知佢好慳家,但為咗間舖,佢不惜飛咗去馬來西亞好多次。」

文:影視組

想跟阿叻一同切磋賽馬心得,立即登記參加「靈活至叻爭霸戰」啦!

第一手消息請瀏覽on.cc 東方互動《即時新聞》