無綫擺慘劇上枱演員反感

菲律賓人質事件乃港人傷疤,一向愛將時事放於劇集之上的無綫,竟連此慘劇都唔放過,在新劇《飛虎》中,重演悍匪於旅遊巴挾持人質一事,無疑挑戰香港觀眾底線,宣萱直言這場戲冇好過有,馬德鐘亦不希望在港人傷口上灑鹽!而演悍匪的馬國明,隨時被人擲臭雞蛋。

由馬德鐘、宣萱、馬國明主演新劇《飛虎》,將重演悍匪於旅遊巴挾持人質一事,大有譁眾取寵之嫌!不少演員得悉此事都大感無奈。該場戲講飾演悍匪的馬國明,走上旅遊巴挾持苟芸慧、盧宛茵等人,要求警方釋放他的老婆賈曉晨,最終因受了傷的賈曉晨傷重死亡,令馬國明未能再見老婆,遂狂性大發,當中,於旅遊巴挾持人質以及因親情激怒悍匪兩點,與菲律賓人質事件都十分相似,不少演員接到劇本得知有這一幕戲時,都大為反感,擔心會觸動觀眾的傷痛,但劇組仍然「維持原判」,今日更將於九龍城拍攝該場戲份!

宣萱唔敢出聲

記者致電該劇女主角宣萱,她直言:「我都好擔心,因為當初睇到劇本時,都覺得冇好過有,大家都喺度傷痛緊,不過,既然編劇咁寫,監製都批咗,作為演員都唔能夠控制同say no。(有冇同監製反映下?)冇,如果講嘅話,就踩過界!我相信佢哋都會小心處理。」

該劇男主角馬德鐘,亦直言作為演員好多時都很被動,他很不想該幕戲會令觀眾聯想到菲國人質事件,因這是每一個港人都感到心痛的事,不應在港人傷口上灑鹽。

馬國明冇得驚

至於在該場戲飾演悍匪的馬國明,在劇集出街時,一定是「焦點人物」,隨時被掟臭雞蛋,問他可會擔心觀眾反應很大,他說:「冇得驚,自己只可以跟劇本去做,但我都唔希望呢場戲會令觀眾諗起菲律賓件事,其實劇情唔係講番嗰件事,只係喺旅遊巴上面挾持人質,先會聯想到嗰件事。」

記者致電該劇監製林志華,他承認《飛》劇有旅遊巴挾持人質一幕,但絕不是以菲律賓人質事件作藍本,一切都是依劇情去撰寫,問他可會擔心令觀眾有所聯想?林志華表示:「冇諗咁多,只想拍好套劇!」

文:影視組

想跟阿叻一同切磋賽馬心得,立即登記參加「靈活至叻爭霸戰」啦!