陳豪茵媺互冧：呢刻未戀

陳豪不久前被廖碧兒「狠飛」，自此這個筍盤就遭不少女星吼實，昨日，有指陳豪這顆寂寞的心終被陳茵媺（Aimee）俘虜，之前陳豪失戀時正拍攝劇集《心戰》，與Aimee飾演兩兄妹的他被對方發動攻勢狂冧而撻着，陳豪更到Aimee位於將軍澳清水灣半島家過夜。對此，記者昨日致電給陳豪時，他作出否認，並指自己只是去那屋苑睇樓，更不只看過一次，已出入幾次，看過不同呎數及坐向。

再睇樓唔避忌

問陳豪有否看過Aimee間屋，他笑言：「梗係冇啦！（二人甚麼關係？）同事同朋友囉！之前我哋喺《心戰》合作，工作上好欣賞佢，今次佢好用功，稍後套劇出街大家會睇到，至於佢份人我都好欣賞。」提到發展空間，陳豪指都知道大家關注他的感情着落，但強調這一刻二人不是在一起。陳豪又坦言不會怕人講而不去睇樓，他說：「我都綜合咗好多人意見，陳茵媺都有畀意見我，我都係睇約一千呎的單位，自己住的。」

讚一個好男人

而Aimee昨晚七時許返回電視廣播城為《法證先鋒3》拍攝，對於緋聞，她指不是事實，現時自己正拍兩套劇，沒時間拍拖，她又指陳豪沒有上過她家，自己亦不會邀請同事回家，因為是私人地方。

說到陳豪是筍盤，若拍拖大家會戥他們開心，Aimee說：「係真嘅話就係嘅！自己依家真係冇時間拍拖，（陳豪唔好咩？）唔係，佢係一個好男人，（見到佢會否尷尬？）唔會，因為唔係真，（同陳豪有冇機會發展？）之前拍《心戰》都成班人一齊食消夜，係朋友，但未試過單獨出街食飯。」

文：影視組