Chilam 約靚靚60歲補影婚照
張智霖（Chilam）在尾場演唱會繼續深情剖白，含淚表示虧欠了太太袁詠儀（靚靚），約定她60歲時再補拍婚紗照及承諾生死相隨，靚靚感動到哭成淚人，而愛兒張慕童亦首度上場，兩父子公開互咀大晒溫情。
Chilam一連兩場《我係外星人演唱會2011》前晚假紅館圓滿落幕，全晚最感人位，乃Chilam提及因當年年少氣盛，不想被傳媒牽住鼻子走，故沒有搞盛大婚禮，他嗚咽說：「連婚紗相都冇，我對佢（靚靚）有所虧欠，我哋依家約定六十歲時再影過一次（婚紗相）。」台下的靚靚感動到哭成淚人，而激動的Chilam也喊到要重唱《未響妻》。Chilam又感激靚靚患甲狀腺病仍陪他跑步，他發表愛的宣言：「無論生老病死，都要和你（靚靚）一齊。」
許秋怡驚喜合唱
當晚的壓軸嘉賓就是年約四歲多，首度公開登場的愛兒張慕童，和爸爸同着格仔裝的慕童手抱巴斯光年公仔上台，Chilam一見囝囝就張開兩臂抱他，更和愛兒嘴對嘴深深一吻，Chilam問慕童可掛念爸爸？慕童怯場不作聲，Chilam扮嬲並送囝囝落台，但叮囑觀眾：「呢個係我個仔，見到佢唔好打佢。」Chilam唱「完場歌」時《祝君好》，再一次感觸落淚。
而另一驚喜嘉賓，則是和Chilam十九年沒有見的舊緋聞女友許秋怡，雖然台下有各自的另一半王書麒及靚靚「(目及)實」，但台上兩人依然表現親密，全程十指緊扣又攬腰合唱經典歌《現代愛情故事》，靚靚不時拍手及口噏噏，全無醋意，秋怡表示：「你依然咁靚仔，一啲都唔似做咗人爸爸，同二十年前一樣咁fit。」
張栢芝再開金口
而其他嘉賓則有郭富城及為Chilam再開金口獻唱的張栢芝，不過栢芝自知表現緊張，故也說：「我已經盡全力，希望大家體諒。」Chilam人緣甚廣，到場捧場的圈中人極多，有好兄弟沈嘉偉、余文樂，胡杏兒、蔡一傑，還有歐陽震華、苗僑偉、蔡一智、謝天華拖埋另一半夫婦到場，由於好友實太多，靚靚連位都冇，全晚在台邊「罰企」支持老公。
慶功宴上，問他可會補拍婚紗照？他說：「都話六十歲時影。」問Chilam可因靚靚的病而延誤生育計劃，他指病情不會有影響，但沒有計劃，順其自然，況且他稍後要返大陸拍《一代宗師》。Chilam做完慶功宴後，即趕往火鍋店會合靚靚和捧場的嘉賓私下慶功，玩至凌晨五時才散band。
採訪：音樂組