否認扮甩骹推劇 阿佘夠薑閃婚唔撈
無綫花旦佘詩曼昨日接受電台訪問，提到早前於內地發生意外受傷，除甩骹需要打石膏五星期，痛失多場登台演出，荷包重創。她說：「依家好番喇，但因為之前打石膏，有啲肌肉萎縮，要喺屋企做啲簡單嘅伸展動作。」
有傳阿佘詐病拒拍《法証Ⅲ》，她說：「拍唔到覺得好可惜，之前同（梅）小青姐傾咗好耐個角色，我受傷之後打畀佢，揸住個電話十五分鐘都唔敢打。佢好好，好緊張叫我睇醫生。」她又謂未能與黎耀祥合作感到可惜。
盼再衝事業
阿佘坦言仍考慮會否續約無綫，但強調不簽約亦會保持良好關係。有傳她因失落視后而不肯續約，她說：「我唔係咁膚淺，獎唔係唔重要，不過唔係用獎衡量，只想事業更上一層樓。我都有問過啲前輩，好似黃日華就好撐我。（喺內地搵老公？）緣分嘅嘢唔知道。（閃電結婚？）即刻唔做添呀！勁唔勁呀？我可以好癲，可以放棄一切，一時衝動梗係會有，但係之後可以又想拍番。」
另外，有報道指阿佘搭上富二代，她笑謂對方只得廿四歲，自己不接受姊弟戀。提到前緋聞男友陳豪甩拖變「筍盤」，阿佘說：「我都係呀！同佢識咗咁耐唔會擦出火花，擇偶最緊要高過我、大過我、身家唔重要。」
文：音樂組