開騷不念舊情 呂方自認斷背避DoDo
呂方前晚開騷，並揚言要感激一個人，有歌迷大叫其舊愛DoDo（鄭裕玲）名字，抵死的呂方即反擊手指歌迷唔好亂講，並笑言改變了性取向將加入「斷背」一族，引得全場大笑。
呂方一連兩場《Touching Moment Live 2011演唱會》前晚於紅館開鑼，吸引模特兒楊崢捧場，入座率七成，好友杜德偉及音樂總監倫永亮則擔任嘉賓。呂方全晚換上多套西裝，並多次走近歌迷堆握手，期間又與六名女舞蹈員又唱又跳，成功減磅的呂方跳得有板有眼，難怪他笑說：「只要有節奏感同對腳郁吓郁吓就得。」
杜德偉嗌唔公平
呂方介紹嘉賓出場時說：「有一個朋友要多謝。」有歌迷大叫「DoDo」，呂方即指住歌迷說：「唔好亂講，我最近轉咗（指性取向），係男仔嚟，依家男同女都冇所謂，大家支唔支持我？」他續說：「我病嘅時候佢畀藥我食，我肚餓又叫我去佢屋企食飯，我攰時佢又幫我搵按摩師，佢就係倫永亮！」
專程由台灣返港任嘉賓的杜德偉獲呂方大讚身材keep得好，杜德偉即說：「你大過我少少，一啲都冇變，好唔公平囉。」
採訪：音樂組