雷凱欣派奶救醒腳軟男
雷凱欣主演新片的前賣券，雖然今日才預售，但昨日已有fans輪候，排頭位內地fans因舟車勞頓、飢寒交迫，當場見暈，雷凱欣見狀即時派大包、派奶、搽油，令手軟腳軟男fans，重現朝氣，虎虎生威！
雷凱欣主演的《3D肉蒲團之極樂寶鑑》下月十四日在港上映，昨日約三十位fans已率先排隊霸位，有人甚至當街紮營，成功排得頭位的男fans，稱自己一早未食早餐便由廣州出發，更因不敢行開而滴水未沾，面青青的他更當場見暈，適逢前來探班打氣的雷凱欣目睹事發經過，即時烏身替對方搽油，又送上愛心麵包及紙包奶，成功救醒「見暈男」，亦餵飽現場一眾fans。
怕fans捱凍餓親
雷凱欣談到自己妙手回春，她說：「冇諗過fans會提早排隊霸位，戥佢哋辛苦，仲有人暈，好在食啲嘢，冇乜大礙，今晚（即昨晚）天氣凍，可能仲落雨，希望佢哋着夠衫，同埋輪流幫手買飯盒，唔好餓親！」
目標港島區置業
此外，雷凱欣昨日接受亞視《11點後特區》訪問，她說：「好想《3D肉蒲團》快啲上畫，等人知唔係AV，（想搵多啲錢？）我依家已經日日做到冇得停，目標係買樓同屋企人住，想買港島區，（搵好多？）適量啦！我夠節儉嘛！」
文：影視組