Lynn謀組情侶檔增值演技
熊黛林（Lynn）、馬詩慧、Lisa S.、謝婷婷及安志杰等前晚出席品牌連卡佛的活動。對於早前有關Angelababy被指只顧拍拖而經常缺席拍攝工作，Lynn就表示自己會以工作為先，不過亦希望同「影帝」郭富城合作學習演技。
連卡佛除了展示新一季春夏裝，Create & Inspire發布會場更邀得國際知名插畫家Blue Logan，即席將各時尚愛好者以畫筆靈巧地展示於白壁上，前晚更邀得多位名人出席其雞尾酒活動，星光熠熠。
反問Baby戀情
問到熊黛林有關早前Angelababy被指顧住拍拖而經常甩底拍攝，她會否羨慕Baby能與男友一齊拍戲？她即瞪大眼的反問：「佢哋認咗啦咩？我唔會羨慕，要同唔同人合作先可以學到更多嘢。」不過Lynn仍直言希望有機會與城城合作：「我唔係為咗啲咩而想同佢拍，咁佢係影帝嚟o架嘛，佢啲演技咁勁，我都想喺佢身上學嘢！」雖然未肯承認戀情，但戀人之間的甜蜜卻不言而喻。
馬詩慧幫女搵工
同場的馬詩慧腳踏六吋高跟鞋到場，透露大女兒將回港做暑期工：「我依家同Michael（王敏德）都幫佢搭緊路，做Fashion有關嘅工作。（做Model？）大女唔夠高，細女就OK。」而穿着白色襯衫的謝婷婷隱約透出白Bra，與男友安志杰雙雙到場，全程煙靭，羨煞旁人。
文：影視組