近日被傳有新歡的青春偶像Miley Cyrus一向都同狗仔隊無甚摩擦。但前日她為保護阿媽而怒火中燒，竟與狗仔隊開拖，警告狗仔隊別再「傷」其母親。
最近盛傳搭上Kings of Leon成員rock友Jared Followill的Miley，前日百忙中抽空與母親Tish在荷里活一cafe食晏，當她們離開準備取車時，Tish幾乎被一名黑人狗仔隊的攝影機撞倒，Miley見狀立即大喝該名狗仔隊，並嚷着︰「搞乜呀？你嚟真o架！」然後就衝向該名狗仔隊，並一邊用手掩住攝影機一邊大鬧狗仔隊，指他的攝影機撞親其母。
而該狗仔隊連隨否認，並指沒有對她的母親不敬。Miley其後繼續逼該名狗仔隊埋死角，並對住他手指指說︰「你嘅攝影機剛剛撞到我阿媽，你以後唔好再咁樣，我認真嘅！」
雖然Miley不顧儀態對住狗仔隊開火，但有傳媒就大讚她為保護母親不惜一切，值得學習，亦相信該名狗仔隊以後都不會再「傷」她的母親。不過亦有網友睇完片之後指Miley小題大做︰「我覺得佢唔需要咁惡，個狗仔隊碰到佢母親時已經將個攝影機舉起來避佢，我亦唔見到個攝影機撞親佢阿媽。我已經睇過條片好多次，如果佢阿媽被撞嘅話自然反應會立即抱住個頭。」
亦有網友撐Miley，指如果發生在自己母親身上亦會護母心切大鬧狗仔隊，亦有網友批評該名狗仔隊真的走得太近。
文：外娛組